2000 - MARY BERGIN

Sa bhliain 2000 b'í Mary Bergin an chéad duine de cheathrar ó Bhaile Átha Cliath a fuair Gradam Ceoil TG4 go dtí seo. Aithnítear Mary mar cheoltóir a bhfuil níos mó déanta aici ná éinne eile chun an fheadóg stáin a thabhairt chun cinn i saol an cheoil Ghaelaigh. Tá cumas na h-uirlise bige simplí seo léirithe aici, lena stíl shainiúil stuama, agus inchreidteacht tugtha aici d'uirlis a sheinneann na mílte ach a raibh neamh-aird agus b'fhéidir beag is fiú déanta de ag na mílte eile.

Rugadh agus tógadh Mary sa Sean Chill i ndeisceart Átha Cliath, agus d'fhoghlaim sí a cuid ceoil ó cheoltóirí áitiúla agus ó chuairteoirí go dtí an phríomh-chathair. Sheinn sí go rialta ag seisiúin sa Charraig Dhubh agus i gClub Shráid na hEaglaise agus Club Shráid Thomáis i lár na cathrach. Bhí sí mar bhall de Bhanna Céilí an Green Linnet agus de Cheoltóirí Laighean. Bhog sí siar go dtí An Spidéal i nGaeltacht na Gaillimhe ansin, áit a bhfuil sí ina cónaí fós.

Bhí tionchar ollmhór ag a céad cheirnín aonair, Feadóga Stáin, a d'eisigh Gael-Linn i 1979. Ó shin, tá ceirnín aonair eile déanta aici, sheinn sí le De Danann agus tá sí ina ball den ghrúpa Dordán, a mheascann an ceol traidisiúnta le ceol barócach. Tá cáil i bhfad is i ngearr ar an ngrúpa agus tóir ar leith air ar fud na hEorpa.

Tá cáil ar Mary mar mhúinteoir den scoth agus tá glúin óg ceoltóirí spreagtha agus tugtha i mbláth aici i gceantair Chois Fharraige agus na Gaillimhe.