2010 - SEÁN McKIERNAN

Cainteoir dúchais as Carna in Iorrais Aithneach in iarthar na Gaillimhe é an píobaire ildánach seo. Bhí cáil an cheoil agus an tseanchais ar a mhuintir roimhe mar gur garmhac é le Pádraic Mac Con Iomaire, duine de na fonnadóirí is mó a sholáthraigh ábhar do lucht bailithe an cheoil.

Ba mhinic leithéidí Shéamus Ennis ag triall ar tigh Mhic Con Iomaire agus níorbh iontas é go bhfuair a chlann an stór iontach sin agus meas ar an oidhreacht le huachta. Thug siad an taisce sin leo ar imirce agus is i mBoston a rugadh Seán ach bhí Gaeilge aige ón gcliabhán agus grá don cheol ón dá thaobh mar go raibh a athair (as Co Liatroime) ábalta go maith ar an bhfidil.

Thug an buachaill óg an ceol leis go luath agus bhíodh a bheirt aintín thall, Bridie agus Annie á spreagadh freisin. Chuir sé suim sna píobaí uilleann agus d'éirigh leis teagmháil a dhéanamh le Leo Rowsome a dhíol seit foghlaimeora píobaí leis ar £10.

Tháinig Seán chun cónaithe in Éirinn i 1965 agus seo leis ag cur aithne ar Willie Clancy, píobaire ciotógach eile, a raibh a chuid ceoil cloiste aige thall ar cheirníní.

D'fhág píobaireacht Phatsy Tuohy a rian go láidir ar Sheán freisin agus is cúis bhróid ar leith dó go bhfuil seit píobaí a rinne Taylor agus a bhíodh ag Tuohy aige féin anois.

Bíonn Seán i gCorcaigh go rialta freisin mar gur múinteoir pianó é i Scoil an Cheoil sa gcathair sin. Is minic é ag seinm ag Tionóil sa mbaile agus i gcéin.