Noel Hill: Gradam Ceoil TG4
Is i gCathair Aodha in iarthar an Chláir a rugadh agus a tógadh é, duine de theaghlach mór ceolmhar. Bhí a thuismitheoirí agus a muintir sin rompu ag dul don chonsairtín agus cérbh iontas mar sin gurbh í sin rogha Noel mar uirlis freisin agus gan é ach ina pháiste. Chomh maith leis na ceachtanna consairtín óna thuismitheoirí, chuaigh seinm a uncail Paddy Hill agus oidhreacht cheoil a cheantair dhúchais i bhfeidhm go mór ar an ógánach agus b’iad Paddy Murphy, Willie Clancy, Paddy Canny, Peadar O’Loughlin, John Reid, Mickey Hanrahan a laochra.
Ní raibh sé ach ina dhéagóir (17) nuair a heisíodh a chéad albam, Inchiquin i bpáirt le Tony Linnane, Tony Callanan agus Kieran Hanrahan. Ina dhiaidh sin i 1979 heisíodh albam cáiliúil eile Noel Hill and Tony Linnane, ceirnín a thuill cáil náisiúnta agus idirnáisiúnta agus atá áirithe mar chlasaic ó shin.
Sa mbliain 1985 ghlac sé páirt i dtaifeadadh cáiliúil eile den teideal I gCnoc na Graí seisiún ceoil agus damhsa ina bhfuil ceol beirte aige le Tony MacMahon agus buíon damhsóirí seite as an gClár agus a taifeadadh i dteach ósta iomráiteach Dan O’Connell i gceartlár Shliabh Luachra.
Thuill an chéad albam eile The Irish Concertina One (1988) an gradam do Cheirnín Traidisiúnta na Bliana. Thaifead sé Aislingí Ceoil i 1993 bpáirt le Tony MacMahon agus Iarla Ó Lionáird. Ba mhinic é ina aoicheoltóir ar cheirníní sa tréimhse seo freisin le leithéidí Mhaighread Ní Dhomhnaill, Paul Brady, Christy Moore, Mick Hanly agus ar cheirnín Planxty, The Woman I Loved So Well.
Is é The Irish Concertina Two (2005) an ceann is deireanaí uaidh le tionlacain ó Alec Finn, Arty Mc Glynn, Brian Mc Grath, Liam O’Connor agus Steve Cooney. Fuair an eisiúint seo ardmholadh ó na léirmheastóirí.
Tá an domhan siúlta aige ag seinm agus ag taifeadadh san Eoraip, i Meiriceá Thuaidh, san Áis agus san Astráil. Tá rian an dúchais agus a phearsantachta féin go láidir ina chuid ceoil. Is i gConamara atá cónaí anois air lena iníon Ashling agus a mhac, Seán, beirt a bhfuil gealladh fúthu féin mar cheoltóirí anois, ní nach ionadh.
