D'éirigh go hiontach le saothar margaíochta le TG4 ag duaisbhronnadh Promax 2009 i bPrág aréir. Thug an fógra Seisiún Duais Óir (Script) agus Duais Airgid (Blaisín) leis i gcomórtas ina raibh saothair den chineál seo ó gach tír san Eoraip san iomaíocht. TG4, i bpáirt lena pháirtí cruthaitheach, QMP a chruthaigh agus a léirigh an saothar seo.

Is é Promax príomh dhuais-scéim thionscal na fógraíochta, margaíochta agus bolscaireachta san Eoraip. Bronntar duaiseanna agus gradaim ar scoth an tsaothair i raon fairsing fógraíochta, margaíochta agus bolscaireachta sna meáin chló, chraolta agus eile. Bhí chúig shaothar de chuid TG4 ar ghearrliosta Promax i mbliana, an líon is mó riamh.

Fógra teilifíse ina léirítear gnáth-sheisiún ceoil i dteach ósta é an saothar Seisiún ach gur léir ó ghrinnfhéachaint ar a dtagann chun solais sa radharc deireanach i ngach leagan de go bhfuil níos mó ar bun ná mar a cheapfá ar dtús. "Fan go bhfeice tú" an mana a ghabhann leis. Bhí ceithre ainmniúchán Promax faighte ag an saothar áirithe seo.

Ní fada ó bhuaigh sé duais idirnáisiúnta eile, Epica freisin agus thug saothair bholscaireachta TG4 cheithre dhuais ICAD leo i mBaile Átha Cliath cúpla mí ó shin freisin.

Thug TG4 Ceannasaí Pól Ó Gallchóir ardmholadh do na saothair bhuacacha seo agus do lucht a gcruthaithe. "Léiríonn na duaiseanna seo go bhfuil saothar bolascaireachta agus margaíochta an chainéil s'againne ar an gcaighdeán is airde san Eoraip," a dúirt sé.

Breis Eolais:
Linda Ní Ghríofa - TG4 - (091) 505050