Beidh sé ina cheol ó dhubh go dubh ar fud bhaile Loch Garman ar an Satharn beag seo, 4 Aibreán agus scoth na gceoltóirí traidisiúnta ag triall ar an mbaile d'ócáid mhór na bliana - bronnadh Ghradam Ceoil TG4 2009. Beidh na réaltaí a gheobhaidh Gradaim na bliana seo ann, dar ndóigh, don Cheolchoirm agus Duaisbhronnadh in Áras Ceoldráma Loch Garman an oíche sin. Is iad Dáithí Ó Sé agus Muireann Nic Amhlaoibh a láithreoidh an ócáid sin agus ar na grúpaí agus ceoltóirí aitheanta a bheidh ar stáitse, beidh Sharon Shannon agus Renegade, At the Racket, an Four Star Trio, Des Mulcaire agus go leor eile.

Ar na daoine aitheanta a bheidh ag bronnadh duaiseanna, beidh an réalta scannán Brendan Gleeson, an t-iarpholaiteoir Bernadette McAlliskey, iarbhainisteoir iomána Loch Garman Liam Griffin, mar aon le Ceannasaí TG4 Pól Ó Gallchóir. Craolfar an ócáid seo ar TG4 ar Dhomhnach Cásca 12 Aibreán ag 9.30pm.

Seo liosta na nGradam do 2009:

Gradam Ceoil TG4: Charlie Harris
Ceoltóir Óg na bliana: Conor McEvoy
Gradam Saoil: Roger Sherlock
Cumadóir na bliana: Con "Fada" Ó Drisceoil
Amhránaí na Bliana: Sarah Ann O'Neill
Gradam na gCeoltóirí: Reg Hall

Níos túisce sa lá beidh an Lón Trad, ceolchoirm saor in aisce ar bun in Ionad Ealaíon Loch Garman, á chur i láthair ag Síle Ní Bhraonáin. Is í an t-amhránaí Mary McPartlan le Steve Cooney agus an grúpa áitiúil Whisht a bheidh ag seinm ansin.

Deir Ceannasaí TG4, Pól Ó Gallchóir gurb iad Gradaim TG4 an scéim aitheantais is fearr a léiríonn meas an náisiúin ar scoth na gceoltóirí. "Tugann na gradaim seo deis dúinn ár meas agus ár mbuíochas a léiriú d'ealaíontóirí an cheoil," a deir sé.

Breis Eolais:
Linda Ní Ghríofa - TG4 - (091) 505050