Daingníodh an cháil atá ar shaothar cruthaithe TG4 i réimse na fógraíochta agus na bolscaireachta nuair a thug saothair bhrandála agus mhargaíochta an chainéil carn eile duaiseanna leo ag duaisbhronnadh Shark 2009 ag deireadh na seachtaine.

Bronnadh chúig cinn de na gradaim ar shaothair a bhí cruthaithe do TG4 ag a pháirtí cruthaitheach, an áisíneacht QMP: Gradam Óir don scriptscríbhneoireacht ar an bhfógra Seisiún, ceann Airgid don fhógra Iallacha Bróg agus gradam Cré-Umha do bhlaisín eile a cruthaíodh do TG4. Sa duaisaicme d'fhógraíocht faoin aer, thug an saothar Uaigh Stroighin gradam Cré Umha leis, faoi mar a thug an leagan sin den fhógra Seisiún.

Thug blaisín a chruthaigh agus a léirigh TG4 féin dá shéasúr scannán buachaillí bó duais eile leo ag na Sharks. Kevin Ó Flatharta ó fhoireann TG4 sa gceannáras i mBaile na hAbhann a chuir an saothar áirithe seo le chéile.

Eagraítear duais-scéim Sharks gach bliain agus is i gCeann tSáile a bhí an bronnadh ar bun i mbliana. Bunaíodh an scéim i 1962 ag tús ré na teilifíse in Éirinn agus áirítear anois í ar cheann de na duais-scéimeanna fógraíochta is aitheanta san Eoraip.

Deir Feidhmeannach Margaíochta TG4, Pádraic Ó Ráighne go dtreisíonn na duaiseanna is deireanaí seo an cháil atá ar TG4 mar cheannródaí nuálaíoch sa réimse seo: "Sanntaíonn gach fógróir duais Shark," a dúirt sé " agus is gnách anois go dtugann saothar TG4 ar a laghad cúpla duais leis gach bliain, slat tomhais ar fhiúntas agus ar ardchaighdeán leanúnach ár n-aschuir sa réimse seo."

Breis Eolais:
Linda Ní Ghríofa - TG4 - (091) 505050