D'éirigh go maith le clúdach speisialta TG4 ar dhá mhór imeacht na nGael ag an deireadh seachtaine, an comóradh ar Bhreithlá 125 Chumann Lúthchleas Gael agus Oireachtas na Gaeilge 2009 i Leitir Ceanainn.

De réir na bhfigiúirí féachana ó AGB Nielsen Media Research, an miosúr oifigiúil teilifíse in Éirinn, bhí aimsiú 700,000 duine ag an sceideal speisialta clár ar théama CLG a chraol TG4 idir meánlae agus meánoíche inné (Lá Samhna 2009, cothrom an lae 125 bliain tar éis bhunú CLG in Óstán Hayes i nDurlas). Mar aitheantas don ócáid agus don pháirtíocht speisialta idir TG4 agus CLG, rinne an cainéal teilifíse Gaeilge rud nach ndearna aon chraoltóir teilifíse riamh roimhe - thiomnaigh sé a chlársceideal iomlán lae d'ábhar faoin gCumann, ó mheánlae go meánoíche, rogha fairsing den sean agus den nua, idir bheochraoladh ar chluiche, fhaisnéis, ghnéchláracha agus cheol.

Ba dheas mar a chuir an craoladh lae sin deireadh le deireadh seachtaine suntasach de chlúdach ar mhórimeacht eile sa bhféilire cultúrtha - Oireachtas na Gaeilge 2009 i Leitir Ceanainn. Thuill clúdach TG4 ón Oireachtas, idir Nuacht TG4, Steip agus Corn Uí Riada Beo aimsiú féachana 400,000 ar an gcainéal le linn na féile.

Deir Ardstiúrthóir TG4, Pól Ó Gallchóir, go bhfuil sé thar a bheith sásta leis an gclúdach cuimsitheach cultúrtha seo. "Tá mar aidhm againn mórimeachtaí na nGael a chlúdach go bródúil cuimsitheach gairmiúil," a dúirt sé "agus deimhníonn na figiúirí féachana seo dúinn go bhfuil muid ag freastal ar an phobal leis an gclúdach sin."

Breis Eolais:
Pádhraic Ó Ciardha - TG4 - (01) 4763030