• Baile an Róba
• Amhrán Bríd Ní Mháille
• Dónall Óg

Baile an Róba

I mBaile an Róba bhíos seal 'mo chonaí is táim faoi dhólas anois le mí
Ag cuimhneamh i gcónaí ar bhláth na hóige, a grua mar rósa is a béilín binn
Bím gach Domhnach ag seinm cheoil dí, a' súil 's go seolfadh Dia mo bhealach í
Ach arís tráthnóna, ó bím go brónach ag smaoineamh ar chomhrá mo chailín fionn.

Ó bean is fiche bhí seal i ngrá liom ach i lán na sráide níor chuir mé suim
Nó go dtáinig an ainnir a bhí múinte mánla is gur thríd an bhfáinne go gcuirfeá í
Bhí culaith gheal uirthi den síoda ab' áille 's bhí an mhil dá fáisceadh as gruaig a cinn
's gur bí mo ghrá-sa an mhaighdean mhánla a d'fhág mé cráite le mo shaol.

Sheas an ainnir seal beag taobh liom mar bhí sí caoithiúil 's ba deas a méin
Ba ró-dheas a pearsa 's a seasamh díreach a com go caol deas is mheall sí mé
Sí ba deise is ba chiúine gáire, dá bhfaca súil aon fhear go fóill
Is a chúr na toinne is a bhláth na n-úlla má dhéanann tú mé dhiúltú ní bheidh mé beo.

Chuaigh mé 'un seanchais le fear den chomharsan ó cérbh í an óig-bhean 'bhí romham sa tslí
Is dúirt sé liomsa gur cailín cóir í agus bean ní b'áille nach raibh sa tír
Tá brainse mór inti de fhuil na bhFianna 's g'aon mhianach mór dá bhfuil sa tír
Sé a h-ainm baiste ó Máirín Seoighe is tá fearaibh Fódhla ar fad 'na diaidh.

Amhrán Bríd Ní Mháille

Is faraoir ghéar nár cailleadh mé an lá ar baisteadh mé go h-óg
Ach fágadh in mo chadhain aonraic mé gan feithide an bhéil bheo
Níl deartháir a'm is níl deirfiúr a'm is níl mo mháithrín beo
Ach tá mo Dheaide bocht lag aosta is a Chríost cén t-iontas dhó.

Is an cuimhneach libhse a chailíní an lá ar fhága mé an Trá Bháin
Ní bhfuair mé an té a chuir comhairle orm ná dúirt liom fanacht ann
Céad glóire do Dhia tá an tsláinte agam is caraid ó Rí na nGrást
Is pé ar bith áit a rachaidh mé ní chasfaidh mé go brách

Is mo bheannacht leis an teach úd inar chaith mé seal den tsaol
Mo bheannacht le mo chuid deartháireachaí bhíodh ann ag déanamh grinn
Muise a Dhia nach bocht an cás a'm é 's gan fáil a'm iad a fháil choíche
Is nach é sin a fháganns buartha mé 's an ghruaig ag titim dhíom.

Mo dhiomú do na curachaí 's mo mhallacht do na báid
Mo dhiomú ghéar don fharraige atá siar leis an Trá Bháin
Nár shíl mé dhá mbáití céad fear go dtiocfadh mo Mhicil slán
Ach a dheartháireachaí breá' nár chuimhnigh sibh a theacht isteach sa snámh.

Is shoraidh dhaoibhse, a dheartháireachaí, nach dtiocfadh isteach i dtír
Nach gcuirfí cónra chláir oraibh amach ó láimh a' tsaoir
Chaoineadh mná óga an bhaile sibh, a gcleamhnas is a ngaol
Ach is mise an bhean a chaill sibh 's a bhéas cráite lena saol.

Is go bhfóire Dia ar na dílleachtaí a d'fhága sibh le fán
Nach mairg a cheapadh tamall dhaoibh sibh scapaithe anonn ná anall
Dhá gcuirfinnse sa reilig sibh ní chuirfinn ann leath-cás
Ach dhá dtúncáil idir mhaidhmeannaí is dhá gcur ó aill go haill.

Tá cumha i ndiaidh Pheaits 'gus Tom agam is caitheadh mór 'na ndiaidh
'S mo dheartháir eile Máirtín a báthadh fadó riamh
Sé Micil bán ba mheasa liom dhá bhfaca mé beo riamh
Ach mo dhiomú-sa don tonn bháite sí a d'fhága mé 'na ndiaidh.

Is go bhfóire Dia ar mo dheirfiúr bhocht 'tá thall ins an Trá Bháin
A' breathnú ar an bhfeilm is ar an áit a mbíodh muid ann
Bhí fairsinge mhór den talamh againn is neart a'nn le cur ann
Ach nach cuma leis an gCeallach é sé fhéin atá in bhur n-áit.

Dónall Óg

A Dhónaill Óig, má théir thar farraige
Tabhair mé fhéin leat is ná déan dearmad
Beidh agat féirín lá aonaigh is margaidh
Is beidh iníon Rí Gréige mar chéile feasta leat.

'Gus gheall tú dhom agus rinne tú bréag liom
Go mbeitheá romham ag cró na gcaorach
Lig mé fead ort is míle béiceadh
Ach ní bhfuair mé romham ann ach na h-uain ag méileach.

Is thug mé grá dhuit is mé beag bídeach
Chuir mé barr air is mé mór millteach
Ní shin é an grá thug an t-uan don chaora
Ach grá buan daingean nach féidir a scaoileadh.

'Gus deir siad liom go bhfuil mo phléata ag ardú
Ní ón bhfíodóir é ná ón táilliúr
Ná gréasaí caol ná sálaí arda
Ach an buachaill geanúil 'bhfuil an baibín bán air.

Má thagann tú chugam ó tar in san oíche
Buail ag an doras nach ndéanann gíoscán
Nuair a fhiafrós mo mháithrín cé dár díobh thú
Ó abair léi gur siolla den ghaoth thú.

Is a Dhónaill Óig, má théir thar farraige
Tabhair mé fhéin leat is ná déan dearmad
Beidh agat féirín lá aonaigh is margaidh
'S beidh iníon Rí Gréige mar chéile feasta leat.