Léirmheas Leabhar | Cláir | TG4 | Súil Eile Skip to main content

Léirmheas Leabhar

Déa
7.30pm
     

Sraith nua ina dtabharfaidh léirmheastóirí agus
údair a meas ar leabhair Ghaeilge nua-fhoilsithe.

Fógraíocht

Léirmheas Leabhar 1-8

Rátáil Tuismitheora: G

Sa tsraith nua seo, déanfaidh léirmheastóirí agus údair léirmheas ar leabhair Ghaeilge nua-fhoilsithe. Á chur i láthair ag Róisín Ní Ghairbhí. Tá an tsraith seo urraithe ag Foras na Gaeilge. Ar chlár na míosa seo déanfar léirmheas ar an leabhar 'Súil Eile' le Seán Tadhg Ó Gairbhí faoi TG4 chomh maith le sraith nua leabhar 'Dónall Dána' do na léitheoirí óga.

Chéad Taispeántas: 16 Sam

Rogha Fotheidil

Le fotheidil a roghnú, brú [CC] ag bun an scáileáin.

Foilsitheoirí Leabhar Gaeilge. Brú ar an nasc thíos:

Sraith nua míosúil litríochta & léirmheastóireachta é ‘Léirmheas Leabhar’ urraithe ag Foras na Gaeilge.  Is í an Dr. Róisín Ní Ghairbhí a bheidh ag cur an t-sraith i láthair.  Beidh béim á cur ar shaothar nua-fhoilsithe, agus léirmheasanna á ndéanamh ar iliomad seánraí do léitheoirí fásta agus léitheoirí óga.  Beifear ag tabhairt eolais maidir le féilte litríochta agus féilte leabhar chomh maith le plé a dhéanamh ar leabhair.  Beidh painéal de léirmheastóirí i dteannta Róisín ar gach clár.

www.facebook.com/leirmheasleabhar
www.twitter.com/LeirmheasTG4


 Na hÚdair


Súil Eile – Seán Tadhg Ó Gairbhí

Is as Ráth Caola in iarthar Luimnigh do Sheán Tadhg Ó Gairbhí. Tá sé ina eagarthóir ar Tuairisc.ie, an tseirbhís nuachta ar líne. D’oibrigh sé mar iriseoir leis an nuachtán Foinse ó 2000 go dtí 2009 agus bhí sé ina eagarthóir ar an nuachtán sin ó 2003 go 2009. Bhuaigh sé duais ‘Iriseoir na Bliana’ ó Oireachtas na Gaeilge in 2007, in 2008 agus arís in 2015. Tá sé ina eagarthóir chomh maith ar an iris Comhar.
Súil Eile
Seán Tadhg Ó Gairbhí
Cois Life, 2017
Clúdach bog, €20

Bunaithe ar thaighde nua agus ar agallaimh leo siúd a bhfuil na fíorscéalta acu faoi bhunú agus faoi fhorbairt TG4, tabharfaidh Súil Eile cuntas beoga, géarchúiseach ar stair na teilifíse Gaeilge le breis agus 20 bliain anuas.
Tugann Súil Eile léargas nua don léitheoir ar scéal suaithinseach an stáisiúin, ó laethanta corraithe an fheachtais ar son Teilifís na Gaeilge go dtí an lá atá inniu ann.
Fite fuaite leis an insint ar stair dhrámatúil TG4 tá léirmheas criticiúil ar a bhfuil bainte amach ag an stáisiún Gaeilge ó bunaíodh é.

Conaire Mór: Seacht nDoras na Cinniúna – Diarmuid Johnson

File, ceoltóir, scríbhneoir agus scoláire é Diarmuid Johnson. I gCardiff na Breataine Bige a rugadh é in 1965. Cuireadh oideachas air i nGaillimh idir 1970 agus 1989. Tá céim B.A., M.A. agus Ph.D. sa Léann Ceilteach aige. Ó 1989 i leith tá blianta go leor caite aige ina léachtóir ollscoile in Éirinn, sa mBreatain Bhig, sa mBriotáin, sa nGearmáin agus sa bPolainn. Chaith sé cúig bliana le ceird na hiriseoireachta agus na heagarthóireachta i gConamara.
Is é Conaire Mór an chéad úrscéal i dtriológ a bhfuil an t-údar ag obair uirthi, úrscéal bunaithe ar sheanscéal Togail Bruidne Da Derga. Is iad Tuatha Dé Danann agus Éadaoin an chéad dá leabhar eile sa tsraith seo a dhéanann iniúchadh cruthaitheach ar luathlitríocht na nGael.

Conaire Mór: Seacht nDoras na Cinniúna
Diarmuid Johnson
Leabhar Breac, 2017
Clúdach crua, €16

Buaiteoir Ghradam Uí Shúilleabháin 2017
Is athinsint bhríomhar bheoga atá in Conaire Mór ar an eipic Sean-Ghaeilge Togail Bruidne Da Derga — sceal a thosaíonn le rí á ghairmeadh de Chonaire agus a chríochnaíonn lena mharú brúidiúil ar bhruach na Dothra.
Na hiontaisí ar fad atá i dtraidisiún na seanscéalta, tá siad ar fáil go flúirseach in imeachtaí an scéil, idir mhacghníomhartha Chonaire agus a theacht i réim, na blianta a raibh Éirinn faoi bhláth lena linn, agus an tuar báis nárbh fhéidir a shéanadh.
Seo scéal nár insíodh i nGaeilge le beagnach míle bliain, ach tá Conaire Mór i réim anois arís ar deireadh. Is é an file Diarmuid Johnson a rinne an t-athscríobh ar an mbuntéacs.

Dónall Dána – Aistrithe go Gaeilge ag Máirín Ní Ghadhra, Gormfhlaith Ní Thuairisg, Marion Ní Shúilleabháin agus Caitlín Ní Chualáin.

Máirín Ní Ghadhra
As na Forbacha i gContae na Gaillimhe do Mháirín Ní Ghadhra. Iriseoir í le RTÉ Raidió na Gaeltachta. Tá sí ina cónaí ar an gCeathrú Rua lena fear agus beirt iníon.
Gormfhlaith Ní Thuairisg
Is as an Lochán Beag, Indreabhán í Gormfhlaith Ní Thuairisg. Is iriseoir í le RTÉ Raidió na Gaeltachta.
Marion Ní Shúilleabháin
Is as Bóthar na Scrathóg, An Cheathrú Rua i gContae na Gaillimhe í Marion Ní Shúilleabháin. Is iriseoir í le RTÉ Raidió na Gaeltachta.
Caitlín Ní Chualáin
Is as baile an Tí Mhóir, Indreabhán, Co. na Gaillimhe í Caitlín Ní Chualáin. Is iriseoir í le RTÉ Raidió na Gaeltachta agus amhránaí aitheanta ar an sean-nós. Bhuaigh sí Corn Uí Riada in 2016.Dónall Dána
Teach na dTaibhsí, Boladh Bréan, Mallacht an Mhumaí, An Feighlí Linbh Fiáin, Díoltas.
Le Francesca Simon
Maisithe ag Tony Ross
Aistrithe go Gaeilge ag Máirín Ní Ghadhra, Gormfhlaith Ní Thuairisg, Marion Ní Shúilleabháin agus Caitlín Ní Chualáin
Cló Iar-Chonnacht, 2017
Clúdach bog, €8

Seans gur chuala tú faoin mbuachaill dána sin Horrid Henry. Anois tá sé in am aithne a chur ar Dhónall Dána, mar atá baistithe ar Horrid Henry sa leagan Gaeilge den tsraith cháiliúil leabhar le Francesca Simon atá curtha i gcló ag Cló Iar-Chonnacht agus iad maisithe ag Tony Ross.
Tá sraith Dónall Dána / Horrid Henry aistrithe go Gaeilge bhreá nádúrtha ag meitheal aistritheoirí; Caitlín Ní Chualáin, Máirín Ní Ghadhra, Gormfhlaith Ní Thuairisg agus Marion Ní Shúilleabháin. Seoladh cúig leabhar nua sa tsraith ag Oireachtas na Samhna, 2017 agus sheol Cúla4 sraith cartúin Dónall Dána ag an ócáid chomh maith. Tá cartúin Dónall Dána le feiceáil ó Luan go hAoine ar Cúla4 ag 16.05.


Imeachtaí


Seoladh Dúnchaoin: Oscail an Scoil i mBaile Átha Cliath
Seolfar Dúnchaoin: Oscail an Scoil (Coiscéim, 2017) le Colm Ó Snodaigh in An Siopa Leabhar, 6 Sráid Fhearchair, Baile Átha Cliath 2 ar an Déardaoin, 30 Samhain ag 7.00 i.n. Scéal Scoil Dún Chaoin, conspóid na h-oscailte. Cad a bhí ar bun sa Roinn Oideachais a chuir an méid sin fearg ar lucht Chorca Dhuibhne?


Seoladh Mise Áine le hÁine Durkin & An Seachtar Stuama as Gaeilge
Beidh Iris Aniar, RTÉ Raidió na Gaeltachta ag craoladh beo ó shiopa nua Chló Iar-Chonnacht in An Cheardlann, An Spidéal ar an Aoine, 1 Nollaig ag 9.00 r.n. tráth a sheolfaidh an scríbhneoir agus aisteoir Joe Steve Ó Neachtain an leabhar nua filíochta le hÁine Durkin, Mise Áine: An Bhean Istigh agus an siopa leabhar nua. Seolfar an t-úrscéal Mac Dé, Cé hÉ? le Pádraig Standún ag an ócáid freisin.
Beidh cóisir mhór do dhaoine óga ag a 3.00 i.n. ar an lá céanna chun an tsraith leabhar An Seachtar Stuama a sheoladh agus is í an scéalaí Máirín Mhic Lochlainn a bheidh ina bean an tí. Tá an tsraith aistrithe go Gaeilge ag Máirín Ní Ghadhra, Gormfhlaith Ní Thuairisg, Marion Ní Shúilleabháin agus Caitlín Ní Chualáin.


Conaire Mór: Seacht nDoras na Cinniúna
Ceiliúradh agus seoladh i mBaile Átha Cliath & Béal Feirste

Bhuaigh an leabhar seo Gradam Uí Shúilleabháin 2017 agus beidh an t-údar Diarmuid Johnson i láthair ag dhá ócáid i mí na Nollag chun míreanna ón leabhar a léamh agus beidh deis cainte agus comhrá ina dhiaidh.
Beidh ceiliúradh ar Conaire Mór: Seacht nDoras na Cinniúna (Leabhar Breac, 2017) le Diarmuid Johnson in An Chultúrlann, 216 Bóthar na bhFál, Béal Feirste mar chuid de Fleádh Feirste ar an 2 Nollaig ag 1.00 i.n.
Seolfaidh Seosamh Ó Murchú, Eagarthóir Sinsireach, An Gúm, an leabhar ag ócáid in An Siopa Leabhar, 6 Sráid Fhearchair ar an Luan, 4 Nollaig ag a 7.00 i.n.


Jeff Kinney ag síniú cóipeanna Dialann Dúradáin: Barr ar an Donas
Beidh an t-údar cáiliúil Jeff Kinney, an fear a chruthaigh an tsraith Diary of a Wimpy Kid ag teacht go Baile Átha Cliath i mí na Nollag. Tá an tríú leabhar sa tsraith Barr ar an Donas díreach foilsithe i nGaeilge ag Futa Fata agus beidh deis ag léitheoirí óga Gaeilge castáil le Jeff agus a gcóipeanna de Dialann Dúradáin a fháil sínithe ag ócáid i siopa leabhar Eason, Sráid Uí Chonaill ar an Satharn, 2 Nollaig ag 11.00 r.n. Tá ticéad ag teastáil le dul isteach ach tá siad saor in aisce ach iad a chur in áirithe roimh ré ag braith ar éileamh. Gach eolas ar shuíomh Eason.


Seoladh Bhaile Átha Cliath Nollaig Ó Gadhra: Cuimhní Cairde
Tá ócáid á heagrú ag Conradh na Gaeilge in An Siopa Leabhar, 6 Sráid Fhearchair, BÁC 2 ar an Satharn, 2 Nollaig ag a 3.00 i.n. chun an leabhar Nollaig Ó Gadhra: Cuimhní Cairde (Cló Iar-Chonnacht, 2017) le Máirín Ní Ghadhra a cheiliúradh.


Mórsheoladh na Nollag Comhar
Beidh an Taoiseach Leo Varadkar i láthair ag mórsheoladh na Nollag Comhar in Acadamh Ríoga na hÉireann, 19 Sráid Dhásain, Baile Átha Cliath 2, ar an Luan, 11 Nollaig ag 6.00 i.n. Seolfaidh an Taoiseach eagrán na Nollag den iris Comhar agus an leabhar nua Leathbhádóirí (LeabhairComhar, 2017) le Marie Whelton ag an ócáid.


Camchuairt léamha Alex Hijmans
Beidh an scríbhneoir Alex Hijmans ar chamchuairt i mí na Nollag agus é ag léamh as a chnuasach nua gearrscéalta Idir Dhá Thír (Cois Life, 2017) agus é ag tabhairt cuairt ar An Spidéal, Baile Átha Cliath agus Béal Feirste. Tabharfaidh sé léamha beo ón gcnuasach nua ag an trí ócáid agus beidh deis ceisteanna a chur ar an údar ag gach ócáid freisin.

● Siopa Leabhar Chló Iar-Chonnacht in An Cheardlann, An Spidéal, Dé Sathairn, 16 Nollaig ag 5.00 i.n.
● An Siopa Leabhar, 6 Sráid Fhearchair, Baile Átha Cliath, seoladh oifigiúil, Dé Céadaoin, 20 Nollaig ag a 7.00 i.n.
● An Chultúrlann, 216 Bóthar na bhFál, Béal Feirste, léamh ag am lóin, Déardaoin, 21 Nollaig ag 1.00 i.n.


Sponsored by
foras_na_gaeilge_logo_2_5_mor_bosca_ban_thbitmap

Físeáin ar Fáil