Séasúr nua den tsraith sheachtainiúil ar shaol na n-ealaíon agus an chultúir, á chur i láthair ag Tristan Rosenstock, ceoltóir cumasach é féin, dar ndóigh.
Cuireann an tsraith ardán ar fáil d’ealaíontóirí agus tabharfar cuairt orthu agus iad i mbun cruthaíochta, ag ceol, ag amhrán, ag damhsa, ag scríobh, ag aisteoireacht, ag stiúradh, ag péintéireacht agus ag dealbhóireacht.
Ealaíontóirí aitheanta a bhíonn i mbun na míreanna eile de réir mar oireann don ábhar: Sinéad Ní Mhaonaigh, Rossa Ó Snodaigh, Theo Dorgan, Michael Cronin, Úna Mullally, Darach Mac Con Iomaire, Fiachna Ó Braonáin, Róise Goan, Dermot McLaughlin agus Sibéal Davitt.
Ar na buaicphointí ó thús an tséasúir, tá ceiliúradh ar an drámadóir Gaillimheach, Tom Murphy, oscailt súl ag Féile Chorp-Phéinteála i gCorcaigh, tuairisc ó Chill Rialaigh in Uíbh Ráthach ar thogra fad-bhunaithe Noelle Campbell-Sharpe do na healaíona agus scannán taibhsiúil faoi Earrach na nArabach.
