TG4 sa tóir ar na damhsóirí traidisiúnta is fearr in Éirinn
Creidtear go bhfuil an damhsa sa tír seo chomh sean le stair na hÉireann féin. Ó bhuail na Ceiltigh cos ar thalamh na hÉireann, breis is dhá mhíle bliain ó shin, ba mhinic iad i mbun damhsa freisin. Faoi mar a tharlaíonn le gach cineál ealaíne agus caitheamh aimsire, d'fhás stíleanna éagsúla agus mheath siad. D'fhorbair an traidisiún agus d'athraigh dá réir. Tá an damhsa traidisiúnta thar a bheith láidir sa lá atá inniu ann agus cáil ar fud an domhain air, a bhuíochas sin do dhíograis na múinteoirí agus do leithéidí Riverdance agus eile.
Anois, seo chugainn an Jig Gig ó TG4, sraith 13 clár ina bhféachfaimid le teacht ar an damhsóir aonair nó an troupe damhsóirí traidisiúnta is fearr sa tír. Comórtas oscailte é seo - níl aon teora aoise, stíle ná eile i gceist. Má tá damhsa traidisiúnta agat/agaibh, tig leat/libh a bheith páirteach.
Reachtáilfear éisteachtaí ar fud na tíre agus gheobhaidh gach duine a dheis a chumas a léiriú - má roghnaítear don chlár teilifíse tú, beidh tú san iomaíocht le gach stil agus aoisghrúpa eile.
Beidh 10 gclár teilifíse sa chéad bhabhta agus roghnóidh an painéal moltóirí s'againne cé a bheidh sna babhtaí ceannais. Sna cláracha ceannais, beidh na buaiteoirí éagsúla in iomaíocht dhíreach le chéile go dtí roghnófar buaiteoir na sraithe.
Is í Róisín Ní Thomáin, a chuirfidh an clár i láthair agus is iad seo leanas na moltóirí:
Breandán de Gallaí, príomhdhamhsóir le Riverdance ar feadh i bhfad agus Stiúrthóir Damhsa leis an seó iontach sin anois. Tá taithí na mblianta ag Breandán ag obair le réalta an damhsa agus aithníonn sé an scoth nuair a fheiceann sé é.
Dearbhla Lennon príomhdhamhsóir le Riverdance, duine de réalta an damhsa sa tír seo le blianta anuas, saineolaí a thuigeann an ealaín.
Labhrás Sonaí Choilm Learraí, fear a bhfuil craobhacha damhsa ar an sean-nós buaite aige agus duine atá thar a bheith dílis don sean stil. Ní chuirfidh Labhrás fiacail ina bhreithiúnas.
