Phléadáil an t-iar iománaí aitheanta, DJ Carey ciontach inniu i 10 gcúis atá curtha ina leith i dtaca le dallamullóg a chur ar an bpobal.
Bhí Carey (54) le cur ar a thriail i gCúirt Chuarda Choiriúil Bhaile Átha Cliath ar maidin ach i bhfianaise é pléadáil ciontach ní gá dul ar aghaidh leis an triail anois.
D'admhaigh sé gur iarr sé ar dhaoine airgead a íoc leis le go mbeadh sé in ann íoc as cóir leighis don ghalar ailse a dúirt sé a bhí air.
Tháinig sé chun solais ina dhiaidh sin nach raibh aon ailse ar an bhfear.
Gearrfar píonós ar DJ Carey i mí Dheireadh Fómhair seo chugainn.
Bhain DJ Carey cáil náisiúnta amach sna nóchaidí a bhuíochas dá chuid imeartha le foireann sinsir Chill Chainnigh.