Vacancies

Eagarthóir Coimisiúnaithe Clár

Conradh Buan

Is mian le TG4 Eagarthóir Coimisiúnaithe Clár a earcú. Ag freagairt don Bhainisteoir Coimisiúnaithe, beidh an tEagarthóir Coimisiúnaithe Clár freagrach as cláracha a oireann do TG4 a fhorbairt, a choimisiúnú agus a cheannach de réir riachtanais sceideal na gclár agus spriocanna TG4, cláracha atá ar an gcaighdeán is airde agus is mó luach do phobal féachana leathan TG4 in Éirinn agus ar fud an domhain.

Fostóir comhdheiseanna é TG4 agus déantar iarratais incháilithe a mheas gan bheann ar inscne, gnéaschlaonadh, aois, taithí shóisialta, cine agus eitneacht, éagumas, stádas sibhialta an teaghlaigh, creideamh ná ballraíocht den Lucht Siúil. Tá meon dearfach ag TG4 i leith na hÉagsúlachta. Fáilteoidh muid roimh iarratais ó dhaoine a bhfuil cúlraí éagsúla acu. Tacaíonn TG4 le daoine faoi mhíchumas a fhostú.
 
Ról
Beidh an té a cheapfar freagrach as ceannasaíocht a ghlacadh ar chláracha atá á gcoimisiúnú idir fhorbairt smaointe, struchtúr an chláir, script, ionchur ealaíon, fhiúntas, bhuiséad agus seachadadh. I measc na bpríomhdhualgas a bheidh ar an té a cheapfar, beidh:

• Ard-bhreithiúnas eagarthóireachta a fheidhmiú ar ábhar craolta teilifíse agus ilardáin;
• Iarratais na mBabhtaí Coimisiúnaithe a léamh agus a mheas;
• A bheith páirteach i roghnú na n-iarratas is fearr a oireann do riachtanais an lucht féachana;
• Treoir choimisiúnaithe a thabhairt do na comhlachtaí léiriúcháin;
• Ról gníomhach comhpháirteach a imirt i bhforbairt sceideal na gclár agus lucht féachana TG4 trí idirbheartaíocht agus comhpháirtíocht a dhéanamh le rannóga eile TG4 – Sceideal, Margaíocht, Meáin Shóisialta, Idirlíon srl.;
• Cláracha Gaeilge den scoth a sholáthar do phríomhsceideal agus ilardáin TG4 atá ar ardchaighdeán agus a thugann an luach is fearr ar airgead;
• An córas coimisiúnaithe agus deiseanna oiliúna a úsáid chun earnáil na léiriúchán neamhspleách Gaeilge a fhorbairt;
• Comhpháirtíocht a chruthú agus comhléirithe a fhorbairt i bpáirt le heagrais chistíochta agus le craoltóirí eile – Údarás Craolacháin na hÉireann / Coimisiún na Meán, Bord Scannán na hÉireann, an Chomhairle Ealaíon, an Ciste Craoltóireachta Gaeilge agus Féilte Scannán agus Teilifíse;
• Seasamh agus íomhá an chraoltóra phoiblí a chur chun cinn agus a bheith ina éascaitheoir ag léiritheoirí agus comhlachtaí neamhspleácha;
• Polasaí chláracha TG4 a fhorbairt mar fhoireann agus i gcomhar leis an Ard-Stiúrthóir;
• Clár coimisiúnaithe a aontú don chraoladh trí aontú réamhlíne agus foirm Rialúcháin TG4.

Nithe atá riachtanach don phost seo:

• A bheith tiomanta d’Fhís, Misean agus Straitéis TG4 a chur i bhfeidhm;
• Saineolas ar chláracha teilifíse agus ábhar ilardáin a fhorbairt;
• Tuiscint ar sceideal TG4 agus ar an gcomhthéacs ina bhfeidhmíonn sé;
• Eolas ar fhreagrachtaí craoltóra poiblí maidir le caighdeáin agus cóid ábhartha clár;
• Taithí agus eolas ar chláracha teilifíse Gaeilge a léiriú i ndomhan dian-iomaíoch ilardáin;
• Tuiscint ar oibríochtaí teilifíse, bainistiú buiséid, dlí na meán cumarsáide agus ar théarmaí trádála na hearnála;
• A bheith ábalta feidhmiú go muiníneach, éifeachtach as do stuaim féin i dtimpeallacht spreagúil;
• Meon dearfach i leith na hoibre agus a bheith ábalta oibriú mar bhall d’fhoireann;
• Taithí mhaith ar chúrsaí riaracháin agus ríomhaireachta ar na hardáin meán sóisialta agus ábalta córais nua a fhoghlaim go tapa;
• Tá eolas ar chórais TG4 (What’sOn, Mediator) ina bhuntáiste, ach cuirfear traenáil ar fáil;
• A bheith ábalta spriocanna oibre a chomhlíonadh agus a chinntiú go mbeidh ábhar, a bheidh ar ardchaighdeán, réidh agus ar fáil in am.

 
Is í an Ghaeilge teanga oibre TG4 agus mar sin tá sé riachtanach go mbeadh Gaeilge den scoth ag an té a cheapfar, idir labhairt agus scríobh na teanga.

Tá an ról seo lonnaithe i gCeannáras TG4 ach tá polasaí oibre solúbtha i bhfeidhm i TG4.

Is é 5pm Dé Máirt an 30 Iúil 2024 an dáta deiridh a nglacfar le hiarratais. Beidh na hagallaimh don ról seo ar siúl ar an gCéadaoin, an 7 Lúnasa 2024 i nGaillimh.

Seol d’iarratas mar aon le litir iarratais chuig cv@tg4.ie .
 
 
 
 

Comhordaitheoir ar an Mol Cruthaitheach

Conradh Cúspóra Sheasta

Fáilteoidh TG4 roimh iarratais ar an bpost Comhordaitheoir ar an Mol Cruthaitheach a bheidh lonnaithe sa gCeannáras i nGaeltacht na Gaillimhe. Is chun clúdach a sholáthar d’fhostaí laistigh den eagraíocht atá sannta ar shocrúchán sealadach a thacaíonn le saoire mháithreachais an conradh seo. Ag freagairt don Bhainisteoir ar an Mol Cruthaitheach, beidh an Comhordaitheoir ar an Mol Cruthaitheach i gceannas ar shruthanna oibre agus ar uainchláir oibre agus saoirí a chomhordú.
 

Ról
Beidh an té a cheapfar freagrach as ceannasaíocht a ghlacadh ar thograí ar leith. I measc na gcúraimí a bheidh i gceist, beidh:

• Clár oibre fhoireann an Mhoil Chruthaithigh a chomhordú
• Uainchláir oibre, saoirí agus clúdach a chomhordú
• Úsáid áiseanna agus trealamh an Mhoil Chruthaithigh a chomhordú
• Úsáid áiseanna agus seirbhísí an Mhoil Cruthaithigh le páirtithe laistigh & lasmuigh de TG4 a riar
• Cuidiú sruthanna & áiseanna oibre inmheánacha a fhorbairt
• Ceannaireacht ar thograí faoi leith sa Mhol Cruthaitheach a chomhordú, de réir mar a bheidh ag teastáil
• Seirbhís tacaíochta riaracháin a chur ar fáil do Bhainisteoir an Mhoil Chruthaithigh de réir mar a bheidh ag teastáil

Nithe atá riachtanach don phost seo:

A bheith ábalta feidhmiú go muiníneach agus go héifeachtach as do stuaim féin i dtimpeallacht spreagúil.

Fócas dearfach, cumas maith foirne agus taithí chruthaithe ar fhoireann bheag a chomhordú.

Taithí mhaith ar chúrsaí riaracháin agus ríomhaireachta (ard-tuiscint ar Excel, MS Office agus ábalta córais nua a fhoghlaim go tapa).

A bheith ábalta spriocanna oibre a chomhlíonadh agus a chinntiú go mbeidh ábhar, a bheidh ar ardchaighdeán, réidh agus ar fáil in am.

Is í an Ghaeilge teanga oibre TG4 agus mar sin tá sé riachtanach go mbeadh Gaeilge den scoth ag an té a cheapfar, idir labhairt agus scríobh na teanga.
 
4pm Dé hAoine an 2 Lúnasa 2024 an spriocdháta d’iarratais. Beidh na hagallaimh don ról seo ann i ndiaidh an dáta sin am éigin le linn na chéad seachtaine de mhí Lúnasa 2024.

Seol d’iarratas mar aon le litir iarratais chuig cv@tg4.ie.
 

Is fostóir comhionannas deiseanna é TG4. Is í an Ghaeilge teanga oibre TG4. Tacaíonn TG4 le daoine faoi mhíchumas a fhostú.