Mná atá ag súil le páiste agus atá faoi chúram máithreachais Ospidéal Portiuncula in oirthear na Gaillimhe, cuirfear iad faoi chúram ospidéal eile sa réigiún sin má tá a sláinte nó sláinte an linbh i mbaol.
Rinneadh an cinneadh agus athbhreithiniú leanúnach á dhéanamh ar chaighdeán an chúraim san aonad máithreachais in Ospidéal Portiuncula.
Mná a bhfuil diaibéiteas toirchis orthu, a bhfuil innéacs ard corpmhaise acu nó a bhí i ndeacracht agus iad ag tabhairt linbh ar an saol cheana, cuirfear na mná sin in ospidéil eile feasta lena leanbh a bhreith.
Cuirfear in ospidéil eile freisin mná a cheaptar atá lena leanbh a bhreith cúig seachtaine nó níos mó roimh an ngnáth-théarma.
Tá a bhfuil beartaithe curtha in iúl d'fhoireann an ospidéil atá suite i lár Bhéal Átha na Sluaighe.
Deirtear gur ar son shábháilteacht na n-othar atá na hathruithe á ndéanamh.
Saolaíodh thart ar 1,300 leanbh in Ospidéal Portiuncula in 2024 agus meastar go mbeidh laghdú de 25% ar an líon sin nuair a chuirfear na hathruithe i bhfeidhm.
Baineann an scéal leis an imní atá léirithe faoin líon naíonán nuabheirthe a cailleadh san ospidéal nó ar bhain dochar inchinne agus tinnis eile dóibh agus iad á dtabhairt ar an saol ann le roinnt blianta.
Anuraidh, cuir i gcás, bhí an céatadán naíonán nuabheirthe ar bhain einceifealapaite iscéimeach hiopocsach (EIH) dóibh san ospidéal níb airde ná mar a bheadh súil leis.
Bhain EIH do sheisear naíonán in Ospidéal Portiuncula anuraidh i gcomparáid le cás amháin an bhliain roimhe sin.
Nuacht agus Cúrsaí Reatha RTÉ