Tá sé tugtha le fios ag aturnae an iarchóitseálaí snámha George Gibney sna Stáit Aontaithe nach gcuirfidh a chliant in aghaidh a eiseachadta go hÉirinn, áit a bhfuil sé cúisithe i gcionta gnéasacha.
Gabhadh George Gibney, atá sna seachtóidí, i stát Florida naoi lá ó shin de bhun barántas a bhí eisithe ag na húdaráis in Éirinn ina leith.
78 cúiseamh a bhaineann le hionsaí mígheanasach a dhéanamh ar chailíní idir ocht mbliana agus cúig bliana déag d'aois atá curtha i leith George Gibney sa tír seo, chomh maith le hiarracht ar éigniú.
Bhí George Gibney le hiarratas a dhéanamh ar éisteacht a fháil i gcúirt in Orlando faoina chás, ach dúirt a aturnae gur cuireadh an t-iarratas sin ar ceal tar éis dá chliant na cúinsí ar fad a chur sa mheá.
Is cosúil go nglacfaidh George Gibney go hoifigiúil lena eiseachadadh go hÉirinn go gairid.
Nuacht agus Cúrsaí Reatha RTÉ