Deir Cumann Ailse na hÉireann go bhfuil sláinte mhná áirithe á cur i gcontúirt anois i bhfianaise an eolais atá tagtha chun cinn maidir leis an tseirbhís náisiúnta scagthástála,'BreastCheck'.
De réir fhigiúirí nua atá foilsithe ag Feidhmeannacht na Seirbhíse Sláinte (HSE) níor bhain 'BreastCheck' amach a cuid spriocanna anuraidh ná arú-anuraidh.
195,000 duine a bhí beartaithe ag an HSE a chur faoi scagthástáil i 2024 ach níor éirigh le 'Breastcheck' ach breis is 137,000 tástáil a dhéanamh.
185,000 duine a leagadh amach do 2023 ach bhí líon na dtástálacha gann freisin an bhliain sin, beagán le cois 166,500 a rinneadh.
Deir Cumann Ailse na hÉireann gurb é an toradh a d'fhéadfadh a bheith ar seo ar fad go bhfaigheadh mná ailse de chineál eile amach anseo, a mbeadh sé níos deacra cóir a fháil dó.
Suas le 3,500 duine chuile bhliain a fhaigheann ailse brollaigh sa tír seo de réir na bhfigiúirí.
Deir Príomhfheidhmeannach na Seirbhíse Náisiúnta Scagthástála, Fiona Murphy go bhfuil easpa foirne sa tseirbhís ag cothú a chuid fadhbanna féin.
Deir sise go bhfuil 'líon na mban san aoisghrúpa 50-69 ag méadú in aghaidh na bliana ach níl an t-earcú foirne a theastaíonn dá réir ag méadú'.
Deir an HSE gur fadhb dhomhanda í seo ach go bhfuil sé ag déanamh a dhíchill féachaint chuige go bhfaigheann daoine tástálacha in am tráth agus go bhfuil sé ag díriú go speisialta ar dhaoine a bhfuil baol ard ailse ag baint leo.
Is seirbhís saor in aisce 'Breastcheck' do dhaoine idir 50-69 bliain d'aois a dhéanann tástáil ar ailse sa bhrollach.
Moltar an duine a thástáil chuile 2 bhliain.
Áirítear go dtagann ailse brollaigh ar thart ar 3,500 duine in aghaidh na bliana más fíor do na tástálacha.
Mná is ea a bhformhór.