Tá na dátaí a bhí curtha in áirithe ag an mbanna ceoil rap Éireannach, 'Kneecap' maidir le ceolchoirmeacha dá chuid sna Stáit Aontaithe curtha ar ceal.
Mí Dheireadh Fómhair i mbliana atá i gceist.
Rinneadh an cinneadh toisc go bhfuil duine den bhanna, Liam Óg Ó hAnnaidh le bheith os comhair na cúirte i Londain arís gar go leor don dáta a mbeadh siad ag taisteal sall go Meiriceá.
Cúisíodh Ó hAnnaidh (27) i Sasana i mí Bealtaine i gcúis bainteach le sceimhlitheoireacht agus é curtha ina leith gur nochtaigh sé brat de chuid mhílisteoirí na Liobáine,Hezbollah le linn ceolchoirme a bhí ag an mbanna i Londain i mí na Samhna seo caite.
Séanann Ó hAnnaidh nó 'Mo Chara' mar is fearr aithne air ar stáitse, an chúis ag rá nach dtacaíonn an banna le Hezbollah ná le treallchogaithe Hamas.
Is ar an 26 Meán Fómhair an dáta atá leagtha do Ó hAnnaidh le bheith os comhair cúirte arís.
Deir 'Kneecap' gur trua leis go gcaithfidh sé na ceolchoirmeacha i Meiriceá a chur ar ceal.
Ach 'beidh an banna ar ais thall ann' a deir sé 'nuair a bhuafaidh muid ár gcás cúirte'.
Deir 'Kneecap' freisin go leanfar lena cheolchoirmeacha i gCeanada agus é mar rún aige dul ag seinm i gcathracha Vancouver agus Toronto.