Tá sé tugtha le fios ag Uachtarán na Stát Aontaithe Donald Trump go ngearrfaidh sé tuilleadh taraifí ar thíortha a deir sé "atá ag déanamh dochar do chomhlachtaí teicneolaíochta as Meiriceá".
Is cosúil gur ar bhallstáit an Aontais Eorpaigh den chuid is mó atá bagairt Trump dírithe, cé nár luaigh sé aon tír ar leith ná aon limistéar ar leith sa ráiteas a phostáil sé ar a mheán sóisialta féin.
Is é "an dochar" atá i gceist aige na dlíthe agus na rialúcháin éagsúla a bhaineann leis an earnáil teicneolaíochta san Aontas Eorpach agus sa Bhreatain.
"Cánacha digiteacha, reachtaíocht maidir le seirbhísí digiteacha, rialúcháin maidir le margaí digiteacha, tugadh isteach iad ar fad le dochar a dhéanamh d'earnáil theicneolaíochta Mheiriceá, nó le leithcheal a dhéanamh ar Mheiriceá", arsa Trump.
Chomh maith le taraifí breise, thug Trump le fios go gcuirfeadh sé srianta nua easpórtála ar tháirgí teicneolaíochta as na tíortha atá ar intinn aige.
Nuacht agus Cúrsaí Reatha RTÉ