Tá an chéad bhabhta tairiscintí ar chúrsaí oideachais tríú leibhéal eisithe ag an Lár-Oifig Iontrála, sé lá ó eisíodh torthaí na hArdteistiméireachta.
Is beagán le cois 59,000 iarrthóir a fuair an beagán le cois 86,000 tairiscint a eisíodh tráthnóna inniu.
Mar le cúrsaí céime nó Leibhéal 8, fuair 51% d'iarrthóirí tairiscint ar a gcéad rogha agus fuair 80% d'iarrthóirí tairiscínt ar cheann amháin dá gcéad trí rogha. Sin le hais 56% agus 83% faoi seach anuraidh.
Ag Leibhéal 6/7, is 90% d'iarrthóirí a fuair tairiscint ar a gcéad rogha, le hais 92% anuraidh.
Is é is dóichí go bhfuair roinnt iarrthóirí dhá thairiscint in éineacht, cúrsa Leibhéal 8 agus cúrsa Leibhéal 6/7 araon. Ní féidir leis na hiarrthóirí sin glacadh ach le ceann amháin den dá thairiscint, áfach.
Ní mór glacadh le tairiscintí faoina 3 a chlog tráthnóna Dé Máirt seo chugainn.
Nuacht agus Cúrsaí Reatha RTÉ