Tionólfaidh Uachtarán na Stát Aontaithe Donald Trump "cruinniú mór" sa Teach Bán in Washington amárach maidir lena bhfuil i ndán do Gaza i bhfad na haimsire, dar le toscaire speisialta Trump sa Mheánoirthear Steve Witkoff.
Thug Witkoff le fios go ndréachtófaí "plean cuimsitheach" sa chrunniú amárach nó an lá dar gcionn.
Mhaígh sé freisin gur "plean téagartha" a bheadh ann, "a chuirfí i dtoll a chéile le dea-mhéin agus ar léiriú a bheadh ann ar dhaonnúlacht Donald Trump".
Ar a shon sin is uile, níor thug Steve Witkoff aon mhioneolas faoina raibh ar intinn ag Trump.
Níos túisce i mbliana, mhol Trump Palaistínigh a dhíbirt as Gaza go buan, oll-athchóiriú ó bhonn a dhéanamh ar an limistéar agus Magh Meall a dhéanamh de – samhail de thír tairngire nó "Riviera an Mheánoirthir", mar a thug sé air.
De réir ar thaibhrigh Trump ag an am, ghlacfadh na Meiriceánaigh seilbh ar Gaza agus is iad a thabharfadh faoi athchuma a chur air.
Gheobhaidís réidh leis na buamaí a bhí fós gan phléascadh, leacóidís an áit ar fad, ghlanfaidís an smionagar as an mbealach agus chruthóidís limistéar dealraitheach a mbeadh dreach iomlán nua air agus a mbeadh tithíocht agus obair ann do chách, arsa sé.
Dála an chách úd, áfach, níorbh iad na Palaistínigh a bhí ar intinn aige ach "pobal an domhain", mar a dúirt sé.
Nuacht agus Cúrsaí Reatha RTÉ