Maraíodh fear sna daichidí i dtubaiste a bhí in Éadan Doire i gCo Uíbh Fhailí go moch ar maidin inniu.
Bhí craein agus dhá veain bainteach leis an tubaiste a tharla ar bhóthar an R401 i mbaile fearainn Dhroim Cúile ar chiumhais theas Éadan Doire ag thart ar 6.15.
Tiománaí ceann den dá veain a bhí sa té a maraíodh agus d'éag sé ar an mball.
Tugadh chun an ospidéil i dTulach Mhór tiománaí an veain eile, fear sna tríochaidí, ach deirtear nach bhfuil sé i mbaol báis.
Tá fiosrúchán faoin tubaiste curtha ar bun ag an Údarás Sláinte agus Sábháilteachta.
Tá a bhfiosrúchán féin bunaithe ag na Gardaí agus tá siad ag achainí ar aon duine a bhí ag tiomáint sa cheantar ag an am teacht chun cainte leo, go háirithe má tá íomhánna ó cheamara deaise acu.
Nuacht agus Cúrsaí Reatha RTÉ