Tá beagnach €36 milliún de mhaoiniú Stáit le cur ar fáil le céibh nua a fhorbairt in Inis Oírr, Co na Gaillimhe.
Cuirfear síneadh leis an gcéibh atá ann cheana agus beidh tuilleadh áiteanna ar fáil le báid a fheistiú ann.
Tógfar freisin bábhún nua leis na tonnta is tréine a bhriseadh agus an suíomh a chosaint ar a thuairgneáil agus a chreimeadh.
Meastar go gcuirfear tús leis an obair in earrach na chéad bhliana eile agus tá súil go mbeidh sí críochnaithe faoi dheireadh 2027.
Dar le Comhairle Chontae na Gaillimhe, atá freagrach as bonneagar na céibhe, gurbh fhearrde go mór muintir Inis Oírr an fhorbairt ó ba láidre agus ba shábháilte an nasc idir iad agus muintir na mórthíre dá barr.
Ba cheart go gcuirfeadh an fhorbairt borradh faoi gheilleagar na háite freisin, a dúradh.
Bainisteoir Chomhar Chaomháin Teo, Antoine Ó Coisdealbha, dúirt sé go raibh muintir an oileáin ag iarradh céibh nua le fiche bliain ar an gcuid is lú agus thug le fios go raibh siad fíorshásta faoin scéala.
Is ón Roinn Forbartha Tuaithe, Pobail agus Gaeltachta a thiocfaidh an maoiniú agus beidh an tAire Dara Calleary in Inis Oírr inniu leis an scéala a fhógairt go hoifigiúil.
Cuid den Phlean Forbartha Náisiúnta is ea an togra.
Nuacht agus Cúrsaí Reatha RTÉ