Tá Uachtarán na hÚcráine, Volodymyr Zelensky agus Ceadbhean na hÚcráine, Olena Zelenska ar a gcéad chuairt oifigiúil ar Éirinn.
Shroich siad aerfort Bhaile Átha Cliath go gairid roimh 11pm aréir.
Chuir an Taoiseach Micheál Martin agus an tAire Stáit sa Roinn Gnóthaí Eachtracha Thomas Byrne fáilte rompu chun na tíre.
Dúirt an Taoiseach Micheál Martin gur onóir a bhí ann do fáilte a chur roimh Uachtarán na hÚcráine agus a bhean chéile go hÉirinn.
I dteachtaireacht a chuir an Taoiseach amach ar an ardán X, dúirt sé go raibh tacaíocht na hÉireann ag muintir na hÚcráine agus iad ag iarraidh a gcuid saoirseachta agus daonlathas na tíre a chosaint.
Bhuail an tUachtarán Zelensky agus a bhean chéile Olena, le hUachtarán na hÉireann, Catherine Connolly ag Áras an Uachtaráin ar maidin.
Shínigh an tUachtarán Zelensky leabhar na gcuairteoirí in Áras an Uachtaráin.
I dteachtaireacht i leabhar na gcuairteoirí, ghabh an tUachtarán Zelensky buíochas ó chroí le Rialtas na hÉireann as tacaíocht dhílis a thabhairt don Úcráin, le linn ionradh na Rúise ar an dtír sin.
Ghabh sé buíochas chomh maith le muintir na hÉireann as a gcuid flaithiúlachta agus as foscadh a thabhairt do mhuintir na hÚcráine sa tír seo.
Ina dhiaidh, bhí cruinniú ag Uachtarán na hÚcráine le hUachtarán na hÉireann, Catherine Connolly in Áras an Uachtaráin.
Chuir an Taoiseach Micheál Martin fáilte roimh Uachtarán na hÚcráine go Tithe an Rialtais tráthnóna.
Bhí cruinniú déthaobhach ag an Uachtarán Zelensky leis an Taoiseach Micheál Martin.
Labhair an Taoiseach Micheál Martin agus an tUachtarán Zelensky leis na meáin ag Tithe an Rialtais tráthnóna.
Dúirt an Taoiseach go raibh an caidreamh idir an dá thír bunaithe ar luachanna a roinneann an dá thír, saoirseacht, daonlathas agus an ceart atá ag gach stát a dtodchaí féin a shocrú.
Dúirt an Taoiseach go leanfaidh Rialtas na hÉireann ag tabhairt tacaíochta don Úcráin.
Dúirt Uachtarán na hÚcráine, Volodymyr Zelensky, go bhfuil seans níos mó anois ann ná mar a bhí riamh roimhe seo deireadh a chur leis an gcogadh san Úcráin.
Tráthnóna, chuir Teachtaí Dála agus Seanadóirí fáilte roimhe go Teach Laighean agus go Dáil Éireann.
Thug an tUachtarán Zelensky óráid uaidh os comhair bhaill an Oireachtais sa Dáil.
Labhair an Ceann Comhairle Verona Murphy i dtosach.
Dúirt an Ceann Comhairle "A Uachtaráin Zelensky, tá fáilte mhór romhat i dTeach Laighean, ionad Pharlaimint náisiúnta na hÉireann. Is mór an meas atá againn ort féin agus ar mhuintir na hÚcráine, agus ar an tseasmhacht agus an diongbháilteacht atá léirithe agaibh chun bhur dtír a chosaint ar an ionróir."
I mBéarla a labhair an tUachtarán Zelensky dá óráid, a mhair 15 nóiméad. Dúirt sé gur mór an onóir a bhí ann do a bheith ag caint in Éirinn, i dtír a thuigeann 'costas na saoirse'.
Ghabh sé buíochas le muintir na hÉireann as tithe a thabhairt do mhuintir na hÚcráine agus iad a chosaint, in am a ngátair. Tá tuairim is 84,000 Úcránach ina gcónaí in Éirinn faoi láthair.
'Tuigeann muintir na hÉireann costas na saoirseachta', a dúirt sé.
Dúirt sé nach féidir le haon duine bréag a insint don domhan mór go deo, fiú Uachtarán na Rúise, Vladimir Putin.
Dúirt an tUachtarán go raibh an Rúis ag iarraidh caitheamh leis Úcráin mar mhaoin dá cuid féin.Tá 'bolscaireacht an fhuatha' ag leanúint ar aghaidh, arsa Zelensky.
Dúirt an tUasal Zelensky go raibh an Úcráin ag troid do gach pobal agus gach ceantar ar domhan.
Dúirt sé go raibh fonn ar an Úcráin seasamh taobh le hÉirinn san Aontas Eorpach. Dúirt sé go raibh sé muiníneach go mbainfidh an Úcráin ballraíocht san Aontas Eorpach amach.
Dúirt an tUasal Zelensky go gcaithfidh an Rúis a bheith freagrach as an gcogadh san Úcráin.
D'iarr an tUachtarán ar an dtír seo tacú le cás chun binse fiosruithe a bhunú chun a chinntiú go mbeadh an Rúis freagrach as páistí ón Úcráin a fhuadach.
Ghabh sé buíochas le Teachtaí Dála agus Seanadóirí as a dtacaíocht dhílis don Úcráin ag rá go bhfuil seans ceart ann anois ar shíocháin san Úcráin má tá sé ag teastáil ón domhan mór.
D'impigh an tUachtarán ar mhuintir na hÉireann leanúint orthu ag tabhairt tacaíochta dá thír ag rá 'na cailligí bhur misneach san Úcráin riamh'.
Tá €125 i gcúnaimh airgid fógartha ag an Taoiseach don Úcráin. Tá an t-airgead mar chuid do threochlár nua páirtnéireachta le hÉirinn a chludóidh an chéad 5 bhliana eile.
Idir an dá linn, tá toscaire speisialta Mheiriceá Steve Witkoff i Moscó do chainteanna le hUachtarán na Rúise, Vladimir Putin, maidir le deireadh a chur leis an gcogadh san Úcráin. Tá na cainteanna mar chuid do bhrú nua ó na Stáit Aontaithe in iarracht comhaontú síochána a bhaint amach.
Dúirt Uachtarán na Rúise inniu nár theastaigh cogadh uaidh leis An Eoraip, ach go raibh sé ullamh chun cogaidh, más rud é gur theastaigh coimhlint dhíreach ón Eoraip le Moscó.
Dúirt Putin nach féidir leis an Rúis glacadh leis na moltaí a cuireadh faoina bráid chun deireadh a chur leis an gcogadh san Ucráin.