Tá cáineadh déanta ag an Taoiseach Micheál Martin ar an gcumas atá ag an ngléas intleachta shaorga (IS) Grok íomhánna graosta de mhná agus de pháistí a chruthú ar X, an suíomh meán sóisialta.
Dúirt sé go raibh sé doghlactha agus uafásach go raibh an gléas á úsáid chun íomhánna mar seo a chruthú.
Faoi láthair, tá Coimisiún na Meán ag plé leis an gCoimisiún Eorpach an imní atá ann go bhfuil an gléas IS seo ag Elon Musk á úsaid ar an gcaoi seo.
Tá an bota comhrá SI Grok, ag cur i bhfeidhm iarratais ó lucht úsáide X na héadaí atá ar mhná agus pháistí in íomhánna a bhaint díobh, agus na híomhánna leasaithe a phostáil arís ar X
Beidh muid á phlé seo go leanúnach le Coimisiún na Méan agus leis an gCoimisiún Eorpach, a dúirt an Taoiseach i mBeijing mar a bhfuil sé i mbun chainteanna trádála le Príomh-Aire na Síne.
Is féidir go bhfuil gníomhartha mar seo ag sárú dlithe reatha, a dúirt sé,agus mar sin nach mór dár n-údaráis é seo a scrúdú go mion agus bheith an-soiléir faoi pháistí agus daoine neamhurchóideacha a chosaint.
Tá cosc iomlán ar fheidmheanna SI atá in ann íomhánna graosta de mhná agus pháistí á lorg ag an Ionad Éigeandála um Éigniú (RCI)
Tá an RCI ag iarraidh ar an Rialtas é a dhéanamh mídhleachtach gléasanna SI bheith ag duine, iad a thairgeadh nó a dháileadh, má tá an cumas iontu bréagíomhánna graosta a chruthú.
Deir Stiúrthóir an Ionaid, an Dr. Clíona Saidléir gur cheart go mbeadh a fhios ag daoine go bhfuil sé mídhleathach in Éirinn íomhána nó bréagíomhánna graosta neamh-chomhthoiliúil a roinnt ar líne.
Coir é íomhá neamh-chomhthoiliúil a ghiniúint agus a roinnt, a dúirt sí.
Is féídir le haon duine a bhfuil mí-úsáid den sórt seo á fhulaingt acu fios a chur ar na Gardaí nó ar hotline.ie, agus tacaíocht a lorg óna hionad áitiúil éigeandála um éigniú, a dúirt Clíona Saidléir.
Deir X go bhfeidhmnítear in aghaidh ábhar mídhleathach ar an árdan, ábhar mí-úsáide gnéis ar pháistí san áireamh, trí chuntais a chur ar fionraí go buan agus trí oibriú i bpáirt le rialtais agus póilíneacht áitiúil.
Caithfear mar an gcéanna le haon duine a iarrann ar Grok ábhar mídhleathach den sórt seo, a dúirt an comhlacht i bpostáil ar X.