Sa Phríomh-Chúirt Choiriúil i gCorcaigh, ciontaíodh fear 32 bliain d'aois as an mBrasaíl i ndúnmharú a iarpháirtí sa chathair sin trí bliana ó shin.
Sin é Miller Pacheco a phléadáil neamhchiontach i ndúnmharú Bruna Fonseca, a bhí 28 bliain d'aois agus arbh as an mBrasaíl í freisin.
Dúradh sa triail gur tháinig Bruna Fonseca go hÉirinn i mí Mheán Fómhair 2022, gur lean Miller Pacheco í i mí na Samhna ach gur chuir sí deireadh leis an gcaidreamh eatarthu taobh istigh de sheachtain.
Lá Caille 2023, áfach, fuair na Gardaí a corp faoi phluid ar leaba in árasán Miller Pacheco ar Shráid na Saoirse i lár chathair Chorcaí.
Dheimhnigh an scrúdú iarbháis gur tachtadh í.
Dúradh sa triail go raibh Miller Pacheco splanctha i ndiaidh Bruna Fonseca agus nach raibh sé in ann scaoileadh léi.
Idir lár mhí na Samhna agus an lá a mharaigh sé í, sheol sé beagnach 2,000 teachtaireacht téacs chuici.
Chriathraigh an giúiré an cás ar feadh uair an chloig sular chiontaigh siad Miller Pacheco i ndúnmharú.
Gearrfar pianbhreith air amárach.
Is príosún saoil a ghearrfar air mar atá sainordaithe de réir dlí i gcásanna dúnmharaithe.
Bhí muintir Fonseca agus muintir Pacheco araon sa chúirt inniu.
Nuacht agus Cúrsaí Reatha RTÉ