Scaipeadh Chlann Lir a bheas ar Airí Rialtais agus Airí Stáit na tíre seo i gcaitheamh na Féile Pádraig i mbliana, óir tá gach uile dhuine acu le bheith páirteach in imeachtaí thar sáile an tráth sin.
Sin cúig Aire Rialtais déag – an Taoiseach agus an Tánaiste ina measc – agus 23 Aire Stáit.
Is ar cheithre hairde na cruinne a bheas a dtriall agus iad le cuairt a thabhairt ar leathchéad tír san iomlán i gcaitheamh na Féile Pádraig.
Beidh ochtar acu sna Stáit Aontaithe, áit a mbeidh cruinniú ag an Taoiseach leis an Uachtarán Donald Trump sa Teach Bán, agus tabharfaidh sé sciuird freisin ar Philadelphia.
Beidh an tAire Gnóthaí Eachtracha Helen McEntee i mBostún agus beidh an tAire Fiontar Peter Burke i Nua-Eabhrac.
Is i stát Georgia a bheas an tAire Ealaíon Patrick O'Donovan; in Chicago a bheas an tAire Tithíochta James Browne; agus is go San Francisco a rachas an tAire Talmhaíochta Martin Heydon.
Is sa Ghréig agus sa Chipir a bheas an tAire Dlí agus Cirt Jim O'Callaghan agus is chun na Vatacáine a rachas an tAire Leanaí Norma Foley.
Níos gaire do bhaile a bheas an Tánaiste Simon Harris, arae is i bPáras agus i Londain a bheas sé siúd.
Níos faide i gcéin, sa Bhrasaíl, a bheas an tAire Iompair Darragh O'Brien. Níos faide fós a rachas an tAire Oideachais Hildegarde Naughton, ós ar an tSile agus an Airgintín a thabharfas sise a haghaidh.
Beidh an tAire Caiteachais Phoiblí Jack Chambers sa tSeineagáil agus sa Nigéir; i gCeanada a bheas an tAire Gaeltachta Dara Calleary; an tAire Sláinte Jennifer Carroll MacNeill, is chun na Gearmáine atá sí le dul; agus is ar íochtar na cruinne, an Astráil, a bheas triall an Aire Ardoideachais James Lawless.
In Los Angeles a bheas an Ceann Comhairle Verona Murphy agus chun na hIndia a rachas an tArd-Aighe Rossa Fanning.
Nuacht agus Cúrsaí Reatha RTÉ