Tugadh fear 32 bliain d'aois os comhair Chúirt Dúiche Dhurlais i gCo Thiobraid Árann agus é cúisithe i ndúnmharú fir 81 bliain d'aois i mbaile Thiobraid Árann anuraidh.
Sin é Seán Harding, as Ardán Mhuire i mbaile Thiobraid Árann, a bhfuil sé curtha ina leith gur dhúnmharaigh sé Timothy 'Teddy' Murnane a fuarthas gan aithne gan urlabhra taobh amuigh dá theach cónaithe i mí Mheán Fómhair anuraidh agus a fuair bás san ospidéal i Luimneach dhá lá ina dhiaidh sin.
Dúirt Garda sa chúirt go ndúirt Seán Harding 'No' nuair a cúisíodh é sa dúnmharú i Stáisiún Gardaí Chaisil.
Cúisíodh Seán Harding roimhe seo in ionsaí díobhálach a dhéanamh ar Teddy Murnane agus i mbuirgléireacht.
Sa chúirt inniu, tarraingíodh siar an chúis maidir le hionsaí díobhálach.
Cuireadh Seán Harding siar faoi choinneáil agus tá sé le tabhairt os comhair na cúirte arís seachtain ó inniu.
Nuacht agus Cúrsaí Reatha RTÉ