Tá iar-uachtarán na Stát Aontaithe Bill Clinton agus a bhean chéile, an tIar-Rúnaí Stáit, Hilary Clinton, le fianaise a thabhairt i bhfiosrúchán comhdhála maidir leis an gciontóir gnéis, nach maireann, Jeffrey Epstein.
Bhí aithne ag Bill Clinton ar Epstein, a bhásaigh sa phríosún in 2019, ach séanann Bill Clinton go raibh aon eolas aige faoi chiontaithe gnéis Epstein agus maíonn sé gur chuir sé deireadh le haon teagmháil a bhí idir é fhéin agus Epstein, 20 bliain ó shin.
Beidh sé seo ar an gcéad uair do Iar-Uachtarán de chuid na Stát Aontaithe fianaise a thabhairt os comhair phainéal comhdhála, ó rinne Gerald Ford amhlaidh in 1983.
Tagann cinneadh Bhill Clinton agus Hilary Clinton fianaise a thabhairt, lá roimh vóta a bhí le reachtáil maidir le ar cheart díspeadh coiriúil a chur i leith na beirte toisc gur dhiúltaigh siad teacht i láthair go pearsanta chun labhairt ag coiste maoirseachta.
Bhí sé curtha i leith an choiste ag Bill agus Hilary Clinton gur coiste claonta a bhí ann, a bhí ag díriú ar na Clintons in iarracht Uachtarán na Stát Aontaithe Donald Trump, duine a bhí mór le Jeffrey Epstein, a chosaint.
Tá sé ráite ag Bill Clinton go bhfuil aiféala air go raibh sé cairdiúil le Epstein agus nach raibh aon rud in aon chor ar eolas aige faoi na coireanna a bhí déanta ag Epstein.