Deir Coiste Eitiltí Ailse Dhún na nGall nach bhfuil cumarsáid ar bith faighte acu ón Aire Iompair Darragh O'Brien inniu faoin éileamh atá déanta acu go gcoinneofaí eitiltí fillte aon-lae as Aerfort na Carraige Finne go Baile Átha Cliath.
Tá achainí phoiblí sínithe ag 14,000 duine ag iarraidh go gcoinneofaí an tseirbhís ar mhaithe le hothair a bhaineann leas an tseirbhís laethúil do choinní ailse, agus ar mhaithe le paisinéirí i gcoiteann.
D’fhreastail 200 duine ar agóid ag an aerfort Dé Sathairn ag iarraidh an tseirbhís eitilte a choinneáil mar atá.
Tá imní mhór sa réigiún le cupla seachtain a deir Máire Mhic Giolla Chomhaill ó Eitiltí & Seirbhísí Ailse Dhún na nGall go bhfuil sé i gceist ag an aerlíne a bhfuil an conradh acu na h-amanna eitilte a athrú.
Cuireadh an imní sin in iúil don Aire Stáit Kevin 'Boxer’ Moran arú inné freisin nuair a bhí sé féin san Iarthuaisceart.
Deir an comhairleoir contae Micheál Choilm Mac Giolla Easbuig a d'eagraigh agóid an tSathairn ag an aerfort go bhfuil go leor ceisteanna le freagairt ag an Rialtas faoin tseirbhís eitilte atá beartaithe faoin gconradh oibleagáide seirbhíse poiblí a bheidh ag teacht i bhfeidhm faoi cheann coicíse, agus an conradh nua le bheith aontaithe le Emerald Airlines roimh an 25ú Feabhra.
Beidh tuilleadh faoin scéal sin ag Ailbhe Ó Monacháin ar Nuacht TG4 ag 1900