I nDáil Éireann, dhearbhaigh an Taoiseach Micheál Martin gurbh é Freddie Scappaticci as Béal Feirste an brathadóir sinsearach san IRA ar thug arm na Breataine Stakeknife mar leasainm air.
Ag trácht dó ar thuarascáil Kenova a foilsíodh roimh an Nollaig, dúirt an Taoiseach go mb'eol do chách sa Dáil cheana féin gurbh é Freddie Scappaticci an té a bhí i gceist.
Ní dúradh i dtuarascáil Kenova cérbh é Stakeknife mar nár cheadaigh na húdaráis sa Bhreatain é ar chúinsí slándála.
Dúirt an Taoiseach go raibh Freddie Scappaticci ag obair d'arm na Breataine idir na 1970í agus na 1990í agus go raibh sé bainteach le coireanna gránna agus tromchúiseacha a rinne an tIRA Sealadach i gcaitheamh na mblianta sin, lena n-áirítear ceithre dhúnmharú dhéag agus cúig fhuadach déag.
Is mithid a ainm ceart a fhoilsiú go hoifigiúil, a dúirt Micheál Martin.
Fuair Freddie Scappaticci bás i Sasana in 2023.
Nuacht agus Cúrsaí Reatha RTÉ