Vótáil Parlaimint na hEorpa i bhfabhar iasacht de €90 billiún a thabhairt don Úcráin as seo go ceann dhá bhliain.
Is ar airm a chaithfear €60 billiún den mhéid sin agus ar riachtanais eacnamaíochta a chaithfear an chuid eile.
458 feisire a vótáil i bhfabhar na hiasachta agus 140 a vótáil ina haghaidh.
Deichniúr den cheithre fheisire dhéag as an Stát seo a vótáil ina fabhar. Vótáil beirt fheisirí Shinn Féin ina haghaidh.
Bhí an margadh déanta seachtain roimh an Nollaig i ndáiríre, tráth a shocraigh ceannairí na mballstáit an iasacht a cheadú.
Roimhe sin, bhí caint ar an Úcráin a mhaoiniú le sócmhainní ón Rúis atá calctha san Aontas Eorpach ach caitheadh an moladh sin i gcártaí ar deireadh.
Ós sa Bheilg atá bunáite na sócmhainní calctha, bhí imní ar an tír sin go háirithe go bhféadfadh an Rúis an dlí a chur uirthise thar aon bhallstát eile dá gcuirfí an moladh i bhfeidhm.
Nuacht agus Cúrsaí Reatha RTÉ