Tugadh fear 45 bliain d'aois os comhair cúirte in Inis Ceithleann i gCo Fhear Manach ar nasc físe inniu agus é cúisithe i ndúnmharú Ellie Flanagan, bean 23 bliain a bhfuarthas a corp i dteach ar an mbaile sin Dé Sathairn seo caite.
Is é leasathair Ellie Flanagan, Martin McCarney, an té atá cúisithe ina dúnmharú.
Tá sé cúisithe freisin i dtrí scian a bheith ina sheilbh aige agus rún aige dúnmharú a dhéanamh.
Fuair na póilíní corp Ellie Flanagan sa teach agus fiosrúchán ar bun acu faoi ghluaisteán a d'imigh den bhóthar i sráidbhaile an Iompú Deiseal, trí chiliméadar déag soir ó thuaidh ó Inis Ceithleann.
Sa chúirt inniu, dúirt abhcóide Martin McCarney nach raibh óna chliant iarratas ar bhannaí a dhéanamh.
Dúirt an t-abhcóide freisin gur mhian leis an gcúisí a leithscéal a ghabháil as a raibh déanta aige.
Cuireadh Martin McCarney siar faoi choinneáil agus tabharfar os comhair na cúirte ar nasc físe arís é coicís ón Luan seo chugainn.
Nuacht agus Cúrsaí Reatha RTÉ