Tá an gradam Oscar don bhanaisteoir is fearr buaite ag an Éireannach Jessie Buckley as an mórpháirt a bhí aici sa scannán Hamnet.
Bronnadh an deilbhín dealraitheach óir ar Jessie Buckley ag an searmamas bliantúil in Hollywood aréir.
Ba í rogha na coitiantachta í don ghradam as páirt Agnes a ghlacadh sa scannán, bean chéile William Shakespeare agus máthair Hamnet.
Scéal grá agus scéal tragóideach a bhfuil gach saghas coir ann atá sa scannán ina léiríonn Jessie Buckley a hildánacht agus a sárchumas mar aisteoir tríd síos.
Is as Cill Airne i gCo Chiarraí Jessie Buckley agus bhí a tuismitheoirí Marina agus Tim, agus a deirfiúr Lily, i láthair ag an ócáid ghalánta le tacú léi agus lena héacht a cheiliúradh ina cuideachta.
Is iad Saoirse Ronan agus Ruth Negga an t-aon bheirt Éireannach eile a ainmníodh don bhanaisteoir is fearr ó bunaíodh na gradaim Oscar 98 bliain ó shin.
Aimnníodh Jessie Buckley don bhanaisteoir tacaíochta is fearr in 2022 as an bpáirt a bhí aici sa scannán The Lost Daughter.
Finscéal staire is ea Hamnet atá bunaithe ar úrscéal a scríobh an t-údar Maggie O'Farrell, arb as Cúil Raithin i gCo Dhoire í ó dhúchas.
Is é an t-aisteoir as Baile Átha Cliath Paul Mescal a bhí ina William Shakespeare in Hamnet, agus bhí sé féin agus stiúrthóir an scannáin Chloé Zhao ar na chéad daoine a thréaslaigh a héacht le Jessie Buckley aréir.
Fuair an scannán ocht n-ainmniúchán ach ba í bean Chill Airne an t-aon bhuaiteoir as a measc.
Agus í ag glacadh leis an deibhín óir ceithre charat is fiche, ghabh Jessie Buckley buíochas ó chroí lena tuismitheoirí, lena fear céile agus a n-iníon óg, agus lena teaghlach ar fad in Éirinn agus gach áit dá mbí siad.
Nuacht agus Cúrsaí Reatha RTÉ