Tá sé ráite ag an Taoiseach, Micheál Martin, go gcaithfidh deireadh a chur leis na hagóidí i gcoinne praghsanna breosla, atá ag leanúint ar aghaidh don tarna lá inniu.
"Tá na hagóidí seo mícheart", a dúirt sé. "Tá sé do-ghlactha go bhfuil carrchlós déanta de Shráid Uí Chonaill agus go bhfuil stáisiúin bhreosla blocáilte."
Tá cruinniú ar siúl inniu idir an Taoiseach, an Tánaiste, Simon Harris, agus Seán Canney, an t-aire atá freagrach as lóistíocht, chun plé a dhéanamh ar ghéarchéim na gcostas breosla.
chun plé a dhéanamh ar ghéarchéim na gcostas breosla
Tá an lucht agóide ag rá go bhfuil siad ag iarraidh bualadh leis an rialtas, ach deir an rialtas go bhfuil siad tar éis labhairt le heagraíochtaí ionadaíochta cheana féin.
Deir an tAire Canney go bhfuil an tír i ngreim ag an lucht agóide. Ba chóir, a dúirt sé, do mhuintir na tíre a bheith ag obair as lámh a chéile.
Tá an Tánaiste ag súil, a deir sé, go dtitfidh praghsanna breosla go luath, i bhfianaise fhógra an lae inné, go mbeidh sos cogaidh i bhfeidhm sa mheánoirthear as seo go ceann coicíse. Beidh Caolas Hormuz ar oscailt arís mar chuid den chomhaontú sin.
imní orthu, a deir siad, go bhfuil a n-ioncam i mbaol de bharr na n-arduithe
atá tagtha ar phraghsanna breosla
Deir Bus Bhaile Átha Cliath agus TFI go bhfuiltear ag cur isteach go mór ar sheirbhísí bus arís inniu de bharr na n-agóidí agus go bhfuil go leor bóithre dúnta.
Tá agóidí ar siúl i gCorcaigh agus i nGaillimh freisin, agus dugaí na Gaillimhe blocáilte ag feirmeoirí agus iompróirí.
Tá agóid ar siúl taobh amuigh den stáisiún breosla ar Mhótorbhealach an M7 i Luimneach. Deir na hiompróirí ansin go bhfuil siad buailte go holc ag praghsanna díosail agus go bhfuil imní orthu go rachaidh a ngnólachtaí i mbá dá bharr.