Tá an cás cúirte sibhialta a bhí tógtha i gcoinne iar-cheannaire Shinn Féin, Gerry Adams tarraingthe siar.
Triúr a d'fhulaing de bharr buamaí difriúla a leag an tIRA sa Bhreatain a thóg an cás.
In Ardchúirt Shasana i Londain inniu, thug dlíodóirí ar son an triúir le fios nach mbeadh a gcliaint ag leanúint ar aghaidh leis an gcás.
Bhí triúr fear ag tabhairt cás sibhialta in aghaidh Gerry Adams faoi thrí mhórionsaí buamála a rinne an tIRA i Sasana sna 1970idí agus sna 1990idí.
Ba iad sin; John Clark a gortaíodh i mbuamáil an Old Bailey i Londain ar an 8 Márta 1973; Jonathan Ganesh a gortaíodh i mbuamáil Cheantar na nDuganna ar an 9 Feabhra 1996; agus Barry Laycock a gortaíodh i mbuamáil Mhanchain ar an 15 Meitheamh 1996.
Líomhnaigh an triúr gur ball den IRA a bhí in Gerry Adams ag an am.
Ba é an lá inniu an lá deireanach den chás sibhialta seo a bhí tugtha in éadan Gerry Adams san Ardchúirt i Londain.
Le linn na héisteachta le coicís anuas shéan Adams go raibh sé ina bhall den IRA ná sna hionsaithe buamála sin.
Ní raibh Adams sa chúirt ar maidin ach I ráiteas ina dhaidh dúirt sé go rabh lúcháir air go rabh sé i measc daoine a chabhraigh le deireadh a chur leis an choimhlint sa Tuaisceart.
Dúirt sé gur tháinig sé i láthair na cúirte as meas ar na fir a thug an cás ina éadan, agus gur deireadh dearfach a bhí ar chás nár cheart a bheith tugtha.
Thug mé dúshlán na líomhaintí a bhí m'éadan le mé féin a chosaint ar an smál agus ar na bréaga a bhí curtha i mo leith, a dúirt Gerry Adams.
Dhearbhaigh mé an ceart a bhain le cúis na Poblachta agus an ceart atá ag pobal na hÉireann ar a saoirse.
Ghabh sé buíochas lena bhean chéile Colette, le Sinn Féin, lena fhoireann dlí agus lena lucht tacaíochta.