Nuacht TG4

Tá €91m gearrtha ag an gCoimisiún um Chosaint Sonraí in Éirinn ar Meta, máthairchomhlacht Facebook, Instagram agus Whatsapp.

Gearradh an fhíneáil orthu i ndiaidh don Choimisiún fiosrúchán a dhéanamh ar an gcaoi a raibh roinnt pasfhocal stóráilte ag Meta i ngnáth-théacs gan chriptiú ar chórais inmheánacha an chomhlachta.

B'iad Meta iad féin a chuir an Coimisiún ar an eolas go raibh na pasfhocail stóráilte gan chosaint acu agus rinneadh an sárú de thaisme, a dúirt siad.

Rialaigh an Coimisiún go raibh ceithre shárú déanta ag Meta ar an Rialachán Ginearálta maidir le Cosaint Sonraí (GDPR). Bhain siad le teip an chomhlachta úsáideoirí a chur ar an eolas go raibh sárú déanta ar a sonraí pearsanta agus le teip an chomhlachta beartais teicniúla ná eagraíochtúla a úsáid chun sonraí na n-úsáideoirí a chosaint sa chéad dul síos.

Chuir an Coimsiún um Chosaint Sonraí in Éirinn a ndréachtchinneadh faoi bhráid na gCoimisiún um Chosaint Sonraí i dtíortha eile san Aontas Eorpach i rith an tsamhraidh. Níor chuir aon cheann de na forais faire sin i gcoinne an chinnidh.

Cuireadh Meta ar an eolas faoi chinneadh an Choimisiún um Chosaint Sonraí inné.

"Glactar leis go forleathan nár chóir pasfhocail a stóráil riamh i ngnáth-théacs", a dúirt Graham Doyle, duine de na coimisinéirí inniu. "Tuigeann comhlachtaí go bhféadfaí aimhleas a bhaint as a leithéid d’eolas a bheith scríofa gan chriptiú."

Thug an Coimsiún um Chosaint Sonraí le fios go bhféadfaí eolas fíor-íogair a bheith sceite de bharr an tsáraithe seo, mar gurbh iad cuntais phearsanta Facebook, Instagram agus WhatsApp na n-úsáideoirí a bhí i gceist.

Chuir Meta an Coimisiún um Chosaint Sonraí ar an eolas faoin sárú i 2019. Thug siad le fios go raibh pasfhocail na gcéadta milliún úsáideoir stóráilte i ngnáth-théacs de thaisme ar feadh seala ar chórais inmheánacha an chomhlachta.

"Léirigh ár bhfiosrúchán inmheánach nár baineadh aimhleas as na pasfhocail seo a bheith stóráilte i ngnáth-théacs", a dúirt Meta i ráiteas ag an am.