Gortaíodh cúig phóilín déag nuair a caitheadh clocha, péint agus ábhar eile leo le linn caismirtí a tharla ar an mBaile Meánach i gCo Aontroma aréir.
Rinneadh damáiste freisin do thithe sa mhí-ord.
Tuairiscítear gur cuireadh dhá theach trí thine i gceantar Bhóthar Chluain Abhann agus gur briseadh fuinneoga i roinnt tithe eile.
Roimhe sin, ghlac na céadta daoine páirt i léirsiú in aghaidh na hinimirce i lár an bhaile tar éis do bheirt ógánach teacht os comhair cúirte i gCúil Raithin agus iarracht ar ionsaí gnéis a dhéanamh ar chailín curtha ina leith.
Ceithre bliana déag atá an bheirt bhuachaillí agus is le cúnamh ó ateangaire a héisteadh an cás.
Dúirt aturnae na beirte go mbeidís ag pléadáil neamhchiontach sa chúis.
Nuacht agus Cúrsaí Reatha RTÉ