Tá an Ghníomhaireacht Náisiúnta um Bainistíocht Sócmhainní (NAMA) le níos mó airgid a thabhairt ar ais don Státchiste ná mar a bhí súil leis – €5.5 billiún seachas €5.2 billiún.
Gníomhaireacht Stáit is ea NAMA atá freagrach as iasachtaí maoine na mbanc ó aimsir na géarchéime airgeadais a bhainistiú.
Cuimsíonn an €5.5 billiún farasbarr de €5.05 billiún agus €450 milliún i gcáin chorparáideach.
Deir NAMA go bhfuil €4.69 billiún den mhéid sin íoctha cheana féin agus go n-íocfar an chuid eile faoi dheireadh na bliana.
In 2009 a bunaíodh NAMA agus tá an ghníomhaireacht le lánscor i mbliana.
Iasachtaí maoine na mbanc a raibh luach thart ar €70 billiún orthu, cheannaigh NAMA iad ar €30 billiún agus chinn an Rialtas ag an am an t-easnamh a chúiteamh do na bainc.
Nuacht agus Cúrsaí Reatha RTÉ