Tuairiscítear gur mharaigh fórsaí míleata Iosrael leathchéad Palaistíneach ar a laghad in Gaza inniu, 25 díobh in aice le hionad dáileacháin bia leis na hIosraelaigh i lár na hiamhchríche.
Maíonn na hIosraelaigh gur scaoil saighdiúirí le slua daoine a bhí ag teannadh leis an ionad bia mar gur thug siad an chluas bhodhar d'ordú ó na saighdiúirí.
Bhí amhras ar na saighdiúirí faoina raibh ar intinn ag an slua, a dúradh.
Tuairiscítear freisin gur maraíodh ceithre dhuine dhéag nuair a scaoil saighdiúirí Iosraelacha le slua in aice le hionad dáileacháin bia eile in Rafah i ndeisceart Gaza.
Tá sé curtha i leith Hamas ag na hIosraelaigh gur lámhach agus gur mharaigh siad cúigear Palaistíneach a bhí fostaithe ag na hIosraelaigh in ionad dáileacháin bia.
Dar leis na hIosraelaigh gur maraíodh an cúigear nuair a rinne Hamas ionsaí lámhaigh ar bhus a bhí ag tabhairt na n-oibrithe chun an ionaid.
Ina cheann sin, tuairiscítear gur mharaigh na hIosraelaigh aon duine dhéag in áiteanna eile in Gaza.
Nuacht agus Cúrsaí Reatha RTÉ