Maraíodh ar a laghad 20 duine in ionsaithe ó aerfhórsa Iosrael ar ospidéal i ndeisceart Stráice Gaza ar maidin.
Maíonn áisíneacht chosaint shibhialta Gaza, a chuir an figiúir seo ar fáil, go raibh cúigear iriseoirí ina measc seo, go raibh duine díobh ag obair le Reuters, duine eile ag obair le stáisiún teilifíse Al Jazeera agus iriseoir eile leis an bpreas idirnáisiúnta,AP.
Ba é Ospidéal Nasser i réigiún Khan Younis a buaileadh.
Deirtear gur scaoileadh an chéad bhuama le foirgneamh san ospidéal, agus an dara ceann ansin go gairid ina dhiaidh sin agus othair á n-aistriú amach.
Deir arm Iosrael nach raibh sé i gceist aige go marófaí on iriseoir sa bhuamáil agus go raibh aiféala air gur maraíodh aon sibhialtach nach bhfuil aon bhaint aige leis an gcogaíocht.
Tá fiosrúchán á bhunú ag na ceannairí míleata in Iosrael a deirtear.
Deir AP go dteastaíonn míniú uaidh láithreach i dtaobh an ionsaithe seo.
De réir na bhfigiúirí ó Chumann Iriseoirí na bPailistíneach tá 240 iriseoir dá chuid maraithe in ionsaithe ó Iosrael ón 7ú Deireadh Fómhair 2023.
Deir an aireacht shláinte i Gaza go bhfuil breis is 62,600 Pailistíneach maraithe ansin ón dáta céanna.
Sibhialtaigh a bhformhór a deirtear.
Ba ar an 7 Deireadh Fómhair 2023 a rinne Hamas an t-ionsaí marfach a raibh bás 1,200 Iosraelach mar thoradh air.
Níor staon Iosrael óna chuid ionsaithe i Gaza ó shin agus é mar aidhm aige a deir sé Hamas a scriosadh.