Dealraíonn sé go mbeidh saighdiúirí síochána ar dualgas sa Liobáin go gceann bliana eile ar a laghad – saighdiúirí as Éirinn ina measc – tar éis do thaidhleoir sinsearach as na Stáit Aontaithe a dhearbhú go dtacóidh na Meiriceánaigh le sainordú na Náisiun Aontaithe sa tír sin nuair a chaithfear vóta ar an gceist níos deireanaí an tseachtain seo.
Agus é ar cuairt sa Liobáin, dúirt toscaire na Stát Aontaithe sa tSiria Tom Barrack go raibh sé i gceist ag na Meiriceánaigh a mbeannacht a thabhairt don sainordú atá le hathnuachan Dé Domhnaigh seo chugainn.
Tá an sainordú á chriathrú ag Comhairle Slándála na Náisiún Aontaithe faoi láthair agus ceapadh go gcaithfí vóta ar an gceist inné.
Ceist íogair atá ann, gan amhras, agus cé go bhfuiltear ag iarraidh an sainordú a athnuachan táthar ag iarraidh freisin tarraingt amach as an Liobáin i gceann na haimsire.
Deirtear go bhfuil an Chomhairle Slándála ag iarraidh an dá ghné sin den scéal a láimhseáil go cothrom go fóill ach ceaptar mar sin féin go gcaithfear an vóta faoi dheireadh na seachtaine seo.
Dúirt iarCheann Foirne Óglaigh na hÉireann Mark Mellett gur mhór an chiotaí do na Náisiúin Aonaithe gan an sainordú sa Liobáin a athnuachan agus thug sé le fios gur chreid sé go mbeadh cogadh eile ann dá uireasa.
Nuacht agus Cúrsaí Reatha RTÉ