Dúirt an t-iarrthóir Uachtaránachta Catherine Connolly go raibh sé ag baint níos mó ama as Sinn Féin cinneadh dhéanamh faoi iarrthóir dá gcuid féin ná mar a bhí súil aici, cé go ndúirt sí ar a shon sin gur thuig sí a gcás.
Tuigeadh nó ná tuigeadh, tá súil ag Catherine Connolly go socróidh Sinn Féin ar deireadh ar thacú léise agus gan a n-iarrthóir féin a chur chun cinn ó tá lé ag an bpáirtí sin agus bean na Gaillimhe le polasaithe a chéile.
Go deimhin, thug Catherine Connolly le fios go raibh gnáthbhaill de Shinn Féin an-bháúil léi.
An tseachtain seo caite, d'iarr Pobal Roimh Bhrabús ar Shinn Fein taobhú le Catherine Connolly sa toghchán Uachtaránachta mar chomhiarrthóir de chuid na heite clé i leaba a n-iarrthóir féin a roghnú.
An Teachta Dála Matt Carthy ó Shinn Féin, dúirt sé inniu go ndéanfadh an páirtí cinneadh as seo go ceann roinnt seachtainí ach thug sé le fios go raibh sé féin idir dhá chomhairle faoin gceist.
Chomh maith le Sinn Féin, tá ceannaireacht Fhianna Fáil fós ag déanamh a marana ar iarrthóir a chur chun cinn.
Mar le Fine Gael, tá beirt ag lorg ainmniúchán an pháirtí sin don toghchán, mar atá, Heather Humphreys agus Seán Kelly.
Glacfaidh Fine Gael le hiarratais ar ainmniúchán go dtí seachtain ó inniu agus ainmneofar an buaiteoir faoi lár na míosa seo chugainn.
Nuacht agus Cúrsaí Reatha RTÉ