Cuireadh tús ar maidin inniu le comhráite, nó réamh-chomhráite i ndáiríre, sa Choimisiún um Chaidreamh san Áit Oibre féachaint le teacht roimh an stailc atá beartaithe ag rúnaithe agus feighlithe scoile ó amárach.
An 2,600 rúnaí agus feighlí atá i gceist, ar baill iad den cheardchumann Fórsa, deir siad nach gcaitear go cothrom leo agus nach bhfuil acusan na sochair atá ag múinteoirí agus cúntóirí riachtanas speisialta.
Murab ionann agus an dá dhream dheánacha sin, níl rúnaithe agus feighlithe i dteideal pinsin earnála poiblí agus is é sin is mó atá ag cur as dóibh thar aon éigeart eile, de réir mar a deir siad féin.
Má théitear chun cinn leis an stailc, nach bhfuil teorainn ama curtha leis, beidh thart ar 2,000 scoil thíos leis.
Tá treoir tugtha ag an Roinn Oideachais do scoileanna oscailt amárach mar is gnách ach tá comhairle curtha ag roinnt ceardchumann ar oibrithe eile scoile gan cúraimí na rúnaithe agus na bhfeighlithe a thógáil orthu féin.
Dúirt an ceardchumannaí sinsearach Andy Pike nach raibh sé dóchasach go dtiocfaí ar réiteach sna comhráite inniu agus thug le fios go deimhin go raibh faitíos air go raibh an Rialtas ar nós chuma liom faoin gceist.
Os a choinne sin, dúirt urlabhraí ón Roinn Oideachais gur feabhsaíodh téarmaí agus coinníollacha oibre rúnaithe scoile le tamall de bhlianta.
Nuacht agus Cúrsaí Reatha RTÉ