Tá sé ráite ag an Aire Sláinte Jennifer Carroll MacNeill go bhfuil imní uirthi faoi chumas an chomhlachta forbartha BAM an tOspidéal Náisiúnta Leanaí a chríochnú in am.
Cuir i gcás, agus mar sholaoid ar an bhfadáil, ar an tAire, bhí 800 conraitheoir ag obair ar an suíomh gach seachtain ag deireadh na bliana seo caite ach ní raibh ach a leathoiread sin – idir 400 agus 500 – ag obair ann le cúpla mí.
Thug an tAire le fios gur ó bhord an ospidéil a fuair sí an fhaisnéis sin.
Dúirt Jennifer Carroll MacNeill freisin nach bhfuil BAM ag caitheamh an oiread airgid ar an togra agus a bheadh súil leis.
Níl an comhlacht ag tarraingt as ciste an togra gach mí ach 30% den €10 milliún is féidir, ar sí.
Ina cheann sin, mhaígh sí nach raibh an obair á déanamh de réir oird ná go stuama.
Tá an t-ospidéal le tabhairt ar láimh do na riarthóirí ag deireadh na míosa seo chugainn agus tá na chéad othair le cur ann i meán an tsamhraidh an chéad bhliain eile.
Ina fhianaise sin, arsa an tAire, ní mór do na riarthóirí an áit a ullmhú a thúisce is féidir ach ionú a fháil chuige.
I ráiteas, dúirt BAM go raibh díomá ar an gcomhlacht faoina raibh ráite ag Jennifer Carroll MacNeill.
Léiríonn a ndúirt sí, dar le BAM, gur breacfhaisnéis a bhí faighte aici.
Mhaígh BAM chomh maith go raibh 99% den togra críochnaithe.
Nuacht agus Cúrsaí Reatha RTÉ