Tá leathchéad mac léinn as Gaza le teacht go hÉirinn as seo go ceann cúpla lá chun tabhairt faoi chúrsaí tríú leibhéal in ollscoileanna éagsúla sa tír seo.
Bhí duainéis ag baint leis an mbeart cigilteach seo a shocrú mar go mb'éigean do na Palaistínigh cead a fháil ó Iosrael imeacht as Gaza agus cead a fháil ón Iordáin dul isteach sa tír sin, gnó nach furasta a chur i gcrích ar na saolta seo.
Bhí cead faighte ag na mic léinn tamall roimhe sin ó na húdaráis in Éirinn teacht abhus ach ní raibh an margadh déanta nó gur thug Iosrael agus an Iordáin a mbeannacht dó.
Ba le cuidiú cáiréiseach na Roinne Gnóthaí Eachtracha agus na Roinne Breisoideachais agus Ardoideachais a baineadh an cuspóir amach i ndeireadh na scríbe.
Tiocfaidh 27 den 52 mac léinn go hAerfort Bhaile Átha Cliath tráthnóna inniu as Iostanbúl sa Tuirc.
Tabharfar chuig ionad leighis iad i dtús báire lena sláinte a mheas agus rachaidh siad as sin chuig an iostas a shocraigh na hollscoileanna ar a son.
Is as áiteanna éagsúla in Gaza na mic léinn.
Nuacht agus Cúrsaí Reatha RTÉ