Tá cuasnóg cornfhoichí Áiseacha aimsithe i gcathair Chorcaí ag saineolaithe ón tSeirbhís Páirceanna Náisiúnta agus Fiadhúlra.
Aimsíodh an chuasnóg gar don áit a bhfacthas ceann de na cornfhoichí níos luaithe an mhí seo.
Níl suíomh na cuasnóige á nochtadh de bharr a íogaire atá an chúis.
An tAire Stáit Christopher O'Sullivan, a bhfuil curaimí fiadhúlra air, dhearbhaigh sé go dtógfaí an chuasnóg ón suíomh agus go ndíothófaí na cornfhoichí a bhí inti.
Bíonn roinnt máithreacha aba i gcuasnóg cornfhoichí Áiseacha agus scaipeann siad san fhómhar lena gcuasnóga féin a fhothú.
Ar ámharaí an tsaoil, arsa Christopher O'Sullivan, ó aimsíodh an chuasnóg i gCorcaigh táthar tagtha roimh an dainséar sin.
Thug an Súilleabhánach le fios go ndeanfaí anailís mhóilíneach ar an gcuasnóg in Ard-Mhúsaem na hÉireann go bhféachfaí lena fháil amach cá as go baileach ar tháinig na coirnfhoichí.
Ina cheann sin, tá tascfhórsa bunaithe ag an tseirbhís fiadhúlra chun dul i ngleic le cásanna mar é san am le teacht, más gá.
Dá lonnódh cornfhoichí Áiseacha in Éirinn, d'fhéadfaidís scrios a dhéanamh ar fheithidí dúchasacha na tíre, lena n-áirítear beacha meala, beacha gabhair, beacha aonair, bumbóga, féileacáin agus mar sin siar.
Maraíonn siad na hinveirteabraigh sin lena larbhaí féin a bheathú leo.
Ar an mórgóir, ní ionsaíonnn cornfhoichí Áiseacha daoine ach amháin má ghriogtar chun feirge iad.
Nuacht agus Cúrsaí Reatha RTÉ