Tuairiscítear gur maraíodh ceithre dhuine dhéag ar a laghad – triúr páistí ina measc – agus gur gortaíodh dhá scór in ollruathar drón agus diúracán a thug fórsaí míleata na Rúise ar phríomhchathair na hÚcráine, Cív, aréir.
Naoi n-uaire an chloig a lean an ruathar a deirtear a bhí dírithe ar cheantair chónaithe den chuid is mó.
Tuairiscítear go ndearnadh damáiste freisin d'fhoirgneamh leis an Aontas Eorpach agus d'fhoirgneamh le Comhairle na Breataine.
Dá dhonacht a raibh ann de scrios, thug fórsaí cosanta na hÚcráine le fios gur tháinig siad roimh 563 den 598 drón agus 26 den 31 diúracán a scaoileadh leis an gcathair agus dúirt gur chuir siad go talamh iad sular bhain siad sprioc amach.
Dúirt Uachtarán na hÚcráine Volodymyr Zelensky gur léirigh an mórionsaí is deireanaí go raibh na Rúisigh ag déanamh neamhshuim d'iarrachtaí Uachtarán na Stát Aontaithe Donald Trump deireadh a chur leis an gcogadh.
Thug Roinn Cosanta na Rúise le fios gur scaoil na hÚcránaigh iad féin os cionn céad diúracán le seacht réigiún sa Rúis aréir ach gur cuireadh iad go talamh sular bhain siad sprioc amach .
Nuacht agus Cúrsaí Reatha RTÉ