Tugadh fear 41 bliain d'aois os comhair cúirte i mBaile Nua na hArda i gCo an Dúin inniu agus é cúisithe i bhfear breacaosta a ionsaí agus a dhúnmharú sa Chaisleán Nua sa chontae sin an deireadh seachtaine seo caite.
Tá sé curtha i leith Mark William Bready gur dhúnmharaigh sé Seán Small, 84 bliain d'aois, a bhfuarthas a chorp ar chúl a thí in Ascaill Shliabh na mBroc sa Chaisleán Nua oíche Dé Domhnaigh.
Ós cúig lá roimhe sin ba dheireanaí a chonacthas Seán Small creidtear gur uair éigin idir an 19 Lúnasa agus an 24 Lúnasa a maraíodh é.
Deir na póilíní go mba bhrúidiúil an t-ionsaí a rinneadh air.
Scaoileadh saor ón bpríosún roinnt seachtainí ó shin Seán Small tar éis dó téarma trí bliana a chur isteach as cionta gnéasacha.
Rinneadh iarratas sa chúirt inniu thar ceann Mark William Bready measúnú meabhairshláinte a dhéanamh air.
Thoiligh an breitheamh an t-iarratas sin agus cuireadh an cúisí siar faoi choinneáil go dtí an 25 Meán Fómhair.
Comharsa leis an marbh is ea an cúisí.
Nuacht agus Cúrsaí Reatha RTÉ