Tá cuidiú á achainí as an nua ag na Gardaí ar an bpobal maidir le cás an bhuachalla óig Kyran Durnin atá ar iarraidh i nDroichead Átha i gCo Lú le trí bliana.
Bliain ó shin a tháinig sé chun solais nach bhfacthas Kyran Durnin le dhá bhliain roimhe sin nuair a bhí sé sé bliana d'aois.
Ní go dtí an 30 Lúnasa 2024, áfach, a cuireadh in iúl do na Gardaí go raibh sé ar iarraidh.
Dúradh leo ag an am go bhfacthas an buachaill go deireanach i nDroichead Átha dhá lá roimhe sin.
Coicís ina dhiaidh sin, más ea, d'fhógair na Gardaí go raibh siad den bharúil gur dhá bhliain roimhe sin a chonacthas é go deireanach i ndáiríre agus thug siad le fios gur chreid siad gurbh amhlaidh a dúnmharaíodh é.
Ina dhiaidh sin, ghabh na Gardaí fear agus bean faoin gcás, chuardaigh siad trí theach agus scrúdaigh siad anmhórán íomhánna ó cheamaraí slándála.
Scaoileadh saor an fear agus an bhean gan aon chúis a chur ina leith ach fuarthas marbh an fear ina theach cónaithe cúpla lá ina dhiaidh sin.
Dúirt na Gardaí gur "tragóid phearsanta" a bhí ina bhás.
Bainteach leis an gcúis tá an Ghníomhaireacht um Leanaí agus an Teaghlach, Tusla, ó tháinig sé chun solais go raibh teagmháil acu le Kyran Durnin agus lena theaghlach san am a caitheadh.
Nuacht agus Cúrsaí Reatha RTÉ