Tá sé fógartha go hoifigiúil ag an bhFeisire Eorpach Billy Kelleher ó Fhianna Fáil go bhfuil sé ag iarraidh ainmniúchán an pháirtí sin don toghchán Uachtaránachta a bheas ar siúl i mí Dheireadh Fómhair.
Is iad Teachtaí Dála, Seanadóirí agus Feisirí Eorpacha Fhianna Fáil a shocrós cé a bheas mar iarrthóir Uachtaránachta ag an bpáirtí agus i ríomhphost a sheol sé chucu ar fad inniu, dúirt Billy Kelleher go mb'áil leis an fhís atá aige don chúram a chur os a gcomhair.
Corcaíoch is ea an Céileacharach, ar 'cara dil' is brí lena shloinne.
Ní hé sin le rá, más ea, gur cara sa chúirt aige é Corcaíoch eile a bhfuil guthaíocht aige ar an gceist, mar atá, ceannaire Fhianna Fáil Micheál Martin.
Go deimhin, is cosúil nach mbaineann dílseacht dúchais le hábhar sa chúis seo ós é an Baile Átha Cliathach aitheanta Jim Gavin rogha Uí Mháirtín.
Ar a shon sin, dúirt Billy Kelleher gur chreid sé gur cheart go mbeadh díospóireacht stuama i bhFianna Fáil faoin Uachtaránacht agus faoin gcineál iarrthóra a dhéanfadh ionadaíocht chóir ar phrionsabail an pháirtí san fheachtas toghchánaíochta.
Nuacht agus Cúrsaí Reatha RTÉ